សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ បុរសម្នាក់កំពុងដើរតាមផ្លូវត្រូវបានខ្មាន់កាំភ្លើងបាញ់ចំនួន២គ្រាប់ត្រូវ១គ្រាប់ រងរបួសធ្ងន់ ហេតុការណ៍នេះបានកើតឡើងកាលពីម៉ោង៣ទាបភ្លឺឈានចូលថ្ងៃទី២៦ ខែមេសា ឆ្នាំ២០២០ ស្ថិតនៅតាមផ្លូវលេខ៥១(ផ្លូវប៉ាស្ទ័រ) ខាងមុខផ្សារសូរិយាម៉ល សង្កាត់ផ្សារថ្មីទី៣ ខណ្ឌដូនពេញ។
សមត្ថកិច្ចបានឲ្យដឹងថាជនរងគ្រោះនៅមិនទាន់បាន ស្គាល់អត្តសញ្ញាណនៅឡើយទេ ដោយដឹងថា ជាអ្នកថ្មើរជើង រងរបួសដោយ គ្រាប់កាំភ្លើង ចំនួន១គ្រាប់ ចំត្រង់កំប៉េះគូទ រីឯជនសង្ស័យមាន គ្នា៣នាក់ ជិះម៉ូតូ២គ្រឿង មិនដឹងអត្តសញ្ញាណ។
ប្រភពពត៌មាននៅកន្លែងកើតហេតុបានឲ្យដឹងថា មុនពេលកើតហេតុគេឃើញជនរងគ្រោះ ចេញពីកន្លែង ផ្ទះហ្គេមណេតល្បែងស៊ីសងជិតកន្លែងកើតហេតុរួចដើរតាមបណ្ដោយផ្លូវលេខ៥១ក្នុង ទិសដៅពីជើងទៅត្បូង ខណៈមកដល់ចំណុចកើតហេតុស្រាប់តែមាន ជនសង្ស័យមួយក្រុមជិះម៉ូតូមកដល់ដកកាំភ្លើងបាញ់សំដៅជនរងគ្រោះចំនួន២គ្រាប់ តែត្រូវ១គ្រាប់បណ្តាលដេកដួលនៅកណ្ដាលថ្នល់ រួចពួកនោះគេចខ្លួនបាត់។
បន្ទាប់ពីកើតហេតុសមត្ថកិច្ចមូលដ្ឋានបានចុះមកដល់ត្រួតពិនិត្យកន្លែងកើតហេតុ និងបានហៅរថយន្តសាមុយដឹងជនរងគ្រោះទៅព្យាបាលនៅមន្ទីរពេទ្យ៕ជ្រោយពេជ្រ
