សារព័ត៌មាន នគរវត្ត តែងតែនាំមុខគេជានិច្ច
ខេត្តត្បូងឃ្មុំ ៖ យោធាមួយរូបធ្វេីដំណេីរដោយម៉ូតូមួយគ្រឿងបានជួបគ្រោះថ្នាក់ ចរាចរណ៍ជាមួយរថយន្តក្នុងទិសដៅផ្ទុយគ្នានៅចំណុចផ្លូវកោងបណ្តាលអោយស្លាប់ភ្លាមៗនៅកន្លែងកេីតហេតុ ។
តាមប្រភពព័ត៌មានពីនគរបាលចរាចរស្រុកមេមត់អោយដឹងថា ហេតុការណ៍ នេះកេីតឡេីងនៅវេលាម៉ោង១១៖៣០នាទី ព្រឹកថ្ងៃទី០៩ ខែឧសភា ឆ្នាំ២០២០ លើផ្លូវជាតិលេខ៧ ចន្លោះបង្គោលគីឡូម៉ែត្រលេខ១៩១-១៩២ ស្ថិតនៅភូមិ៧មករា ឃុំដារ ស្រុកមេមត់ ។
ប្រភពបន្តថា មធ្យោបាយធ្វេីដំណេីររង គ្រោះថ្នាក់ចរាចរណ៍ខាងលេីរវាងម៉ូតូ និងរថយន្តសណ្តោងរ៉ឺម៉ក ដែលបង្កឡើងដោយម៉ូតូម៉ាកហុងដាសុីប៊ីអ៊រ(HONDA CBR) ពណ៌ខ្មៅ ពាក់ស្លាកលេខតាកែវ1B-6117 បើកបរដោយឈ្មោះ គង់ ណារ៉ូ ភេទប្រុស ថ្ងៃខែឆ្នាំកំណើត ១០-០៦-១៩៩០ ជនជាតិខ្មែរ រស់នៅភូមិដូនម៉ៅលើ ឃុំទន្លេបិទ ស្រុកត្បូងឃ្មុំ ខេត្តត្បូងឃ្មុំ(មុខរបរ យោធា)(ស្លាប់នៅនឹងកន្លែងកើតហេតុ) បានជួបគ្រោះថ្នាក់ចរាចរណ៍ជាមួយរថយន្តម៉ាកហុីយ៉ានដាយ(HYUNDAI) ពណ៌ស ពាក់ស្លាកលេខ កំពង់ចាម3A-6162 សណ្ដោងរុឺម៉កពាក់ស្លាកលេខភ្នំពេញ4A-1319 មិនទាន់ស្គាល់ ឈ្មោះ និងអាស័យដ្ឋានអ្នកបើកបរ ក្រោយពេលកើតហេតុទុករថយន្តនៅកន្លែងកើតហេតុ រត់គេចខ្លួនបាត់។
ប្រភពព័ត៌មានអោយដឹងបន្តទៀតថា យោធារងគ្រោះថ្នាក់ចរាចរណ៍ស្លាប់ បេីកបរម៉ូតូម៉ាកហុងដាសុីប៊ីអ៊រ(HONDA CBR) ពណ៌ខ្មៅ ទិសដៅពីខាងកើតទៅទិសខាងលិច ប្រើប្រាស់ល្បឿនយ៉ាងលឿន ។ លុះបើកបរដល់ចំណុចកើតហេតុ(ផ្លូវកោង)បានជ្រុលចង្កូតមកឆ្វេង មកបុកជាមួយ រថយន្តម៉ាកហុីយ៉ាន់ដាយ(HYUNDIA) ពណ៌ស បើកបរពីទិសខាងលិចទៅទិសខាងកើតចំពីមុខផ្នែកខាងឆ្វេង ពេញទំហឹងតែម្ដង។
ក្រោយវាស់វែង និងធ្វេីកំណត់ហេតុរួចសពត្រូវបានជំនាញនគរបាលចរាចរណ៍ប្រគល់ជូនក្រុមគ្រួសារ ដើម្បីយកធ្វើបុណ្យតាមប្រពៃណី រីឯវត្ថុតាងម៉ូតូចំនួន០១គ្រឿង និងរថយន្តចំនួន០១គ្រឿង ជំនាញបានយកមករក្សាទុកនៅអធិការដ្ឋាននគរបាលស្រុកមេមត់ ដើម្បីបំពេញសំណុំរឿងតាមនីតិវិធី ៕ ដោយ ៖ វណ្ណៈ
