សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ ក្រុមអ្នកព្យាកក្រសួងធនធានទឹក និង ឧតុនិយម នៅថ្ងៃនេះបានចេញសេចក្តីជូនដំណឹងដោយណែនាំអោយប្រុងប្រយ័ត្នចំពោះបាតុភូតផ្គរ រន្ទះ ខ្យល់កន្ត្រាក់ ដែលនឹងអាចកើតមាន ជាពិសេសបណ្តាខេត្តនៅតំបន់វាលទំនាបក្នុងនោះមាន ជាអាទិ៍ ខេត្តបន្ទាយមានជ័យ ប៉ៃលិន ពោធិ៍សាត់ បាត់ដំបង សៀមរាប ឧត្តរមានជ័យ និងខេត្តព្រះវិហារ ចាប់ពីថ្ងៃទី១៣-១៦ ខែឧសភាខាងមុខនេះ ។
នេះបេីតាមសេចក្តីជូនដំណឹងរបស់ក្រសួងធនធានទឹកនិង ឧតុនិយម ចុះនៅ ថ្ងៃទី១១ ខែឧសភា ឆ្នាំ២០២០នេះ ដោយបានបញ្ជាក់មូលហេតុថា ជ្រលងនៃសម្ពាធទាបបង្កើនឥទ្ធិពលមកលើភាគពាយ័ព្យ និងខាងជើងកម្ពុជា ។ នៅថ្ងៃទី ១៥ ខែឧសភា របបខ្យល់មូសុងនិរតីបក់មកលើកម្ពុជាជាមួយនឹងការ ចាប់ផ្តើមមកដល់នូវរដូវវស្សា ។
តាមរយៈការព្យាករអាកាសធាតុខាងលេីនេះបានបញ្ជាក់ទៀតថា ស្ថានភាពបែបនេះ ធ្វើឲ្យចាប់ពីថ្ងៃទី១៣ ដល់ថ្ងៃទី ១៥ ខែឧសភា៖
១- បណ្តាខេត្តនៅតំបន់វាលទំនាបកណ្ដាល ៖
– សីតុណ្ហភាពអប្បបរមា មានពី ១៥-២៨°C
– សីតុណ្ហភាពអតិបរមា មានពី ៣៦-៣៩°C ។ បណ្តាខេត្តនៅផ្នែកពាយ័ព្យ នឹងអាចមានភ្លៀងពីខ្សោយទៅបង្គរ ។ ឯផ្នែកដទៃទៀតអាចមានភ្លៀងពីខ្សោយទៅមធ្យម ។
– ចាប់ពីថ្ងៃទី១៥-១៩ ខែឧសភា ភ្លៀងនិងបន្តធ្លាក់រាយប៉ាយក្នុងកម្រិតតិចទៅបង្គរ ។
២- បណ្តាខេត្តនៅតំបន់ជួរភ្នំដងរែក និងខ្ពង់រាបឦសាន ៖
– សីតុណ្ហភាពអប្បបរមា មានពី ៦៥-៦៧°c
– សីតុណ្ហភាពអតិបរមា មានពី ៣៤-៣៨°C ។ បណ្តាខេត្តនៅជាប់ជួរភ្នំដងរែក អាចមានភ្លៀងពីខ្សោយទៅបង្គរ ។
– ចាប់ពីថ្ងៃទី ១៥-១៩ ខែឧសភា ភ្លៀងនិងបន្តធ្លាក់រាយប៉ាយក្នុងកម្រិតខ្សោយទៅបង្គួរ។
៣-បណ្តាខេត្តនៅតំបន់មាត់សមុទ្រ ៖
– សីតុណ្ហភាពអប្បបរមា មានពី ២៥-២៨°c
– សីតុណ្ហភាពអតិបរមា មានពី ៣៣-៣៦°C នឹងអាចមានភ្លៀងពីតិចទៅបង្គរ ។
ស្ថិតក្នុងអំឡុងព្យាករអាកាសធាតុខាងលេីនេះ ក្រុុមការងារក្រសួងធនធានទឹក និងឧតុនិយមបានណែនាំប្រុងប្រយ័ត្នចំពោះបាតុភូតផ្គរ រន្ទះ ខ្យល់កន្ត្រាក់ ដែលនឹងអាចកើតមាន ជាពិសេសបណ្តាខេត្តនៅតំបន់វាលទំនាប័ ក្នុងនោះ
មានជាអាទិ៍ ខេត្តបន្ទាយមានជ័យ ប៉ៃលិន ពោធិ៍សាត់ បាត់ដំបង សៀមរាប ឧត្តរមានជ័យ និងខេត្តព្រះវិហារ ចាប់ពីថ្ងៃទី១៣-១៦ ខែឧសភាផងដែរ ៕ ដោយ ៖ សុខខេមរា
