សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ រថយន្ដអាបែនដឹកដីមួយគ្រឿងបើកបុកម៉ូតូកង់បីឥណ្ឌាបណ្ដាលឲ្យបុរសម្នាក់ស្លាប់ ក្រោយពេលបញ្ជូនទៅមន្ទីពេទ្យ ។
ហេតុការណ៍ចរាចរណ៍នេះបានបង្កឲ្យមានការភ្ញាក់ផ្អើលកាលពីវេលាម៉ោង១២ និង២០នាទីយប់រំលងអាធ្រាត្រឈានចូលថ្ងៃទី១៨ ខែឧសភា ឆ្នាំ២០២០ ស្ថិតតាមបណ្ដោយផ្លូវឧកញ៉ាម៉ុងរិទ្ធី កែងនិងផ្លូវ១០០៣ ក្បែរការ៉ាសាំងPTT ក្នុងសង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ ជនរងគ្រោះមិនស្គាល់អត្តសញ្ញាណ។ យោងតាមប្រភពពីកន្លែងកើតហេតុបានប្រាប់ឲ្យដឹងថាមុនពេលកើតហេតុគេឃើញរថយន្ដអាបែនមួយគ្រឿងក្បាលពណ៌ស្លែពាក់ស្លាកលេខខេមរភូមិន្ទ02 3-5687 បើកដោយបុរសម្នាក់ក្នុងទិសដៅពីកើតមកលិចក្នុងល្បឿនលឿនខណៈពេលមកផ្លូវបំបែកជាបួនកែងនិងផ្លូវ១០០៣ ក៏មានម៉ូតូកង់បីឥណ្ឌាមួយគ្រឿងពណ៌សលាយខៀវខ្ចីពាក់ស្លាកលេខភ្នំពេញ1HV-2923 ជិះដោយបុរសម្នាក់បានជិះបត់មកផ្លូវឧកញ៉ាម៉ុងរិទ្ធីក៏ត្រូវរថយន្ដអាបែនដឹកដីខាងបើកបុកចំពីចំហៀងពេញទំហឹងបណ្ដាលឲ្យបុរសជាម្ចាស់កង់បីឥណ្ឌាស្លាប់ក្រោយពេលបញ្ជូនទៅមន្ទីពេទ្យ យ៉ាងអាណោចអាធម័ ចំណែកឯម្ចាស់រថយន្ដបង្កឃើញដូចច្នេះក៏ចុះពីរថយន្ដគេចខ្លួនបាត់ស្រមោល។
ក្រោយពេលកើតហេតុសមត្ថកិច្ចបានចុះមកដល់និងកន្លែងកើតហេតុបានធ្វើការវាស់វែង យកសពជនគ្រោះទៅប្រគល់ឲ្យសាច់ញាតិយកទៅធ្វើបុណ្យទៅតាមប្រពៃណី ។ រីឯម៉ូតូកង់បីឥណ្ឌានិងរថយន្ដបង្កសមត្ថកិច្ចយកទៅរក្សាទុកសិនរងចាំសាច់ញាតិនិងម្ចាស់រថយន្ដបង្កចូលខ្លួនទៅដោះស្រោយគ្នានៅពេលក្រោយ៕ ដោយ៖ ភារ៉ា ដង្កោ
