បណ្តាញសង្គមTwitter «ចាក់សំាងចូលភ្លើង»ពាក់ព័ន្ធអត្ថបទដែលលោកត្រាំបង្ហោះ

អាមេរិក៖ បណ្តញសង្គមដ៏ល្បីល្បាញនៅអាមេរិក គឺ​ Twitter ​បាន«ចាក់សាំងបន្ថែមលើភ្លើងកំពុងតែឆេះ» ក្នុងពេលកំពុងប្រឈមមុខ​តានតឹងជាមួយប្រធានាធិបតីត្រាំ ។ ​Twitter បាន បោះត្រាព្រមាន លើអត្ថបទរបស់លោកត្រាំ ដែលសរសេរមានខ្លឹមសារញុះញងឱ្យមានអំពើហិង្សា​។
សារព័ត៌មាន​រ៉យទ័របានផ្សាយថា នៅថ្ងៃទី​២៩ខែឧសភា​​ Twitter ​បានបោះត្រាព្រមាន«ខ្លឹមសារមានហិង្សា»ទៅលើអត្ថបទរបស់លោកត្រាំ​ ដែលបានបង្ហោះលើបណ្តាញសង្គមនេះ​។ អត្ថបទរបស់លោកត្រាំ​បានសរសេរពាក់ព័ន្ធនឹងបាតុកម្ម នៅទីក្រុងMinneapolis រដ្ឋ Minnesota ត្រូវបានបណ្តាញសង្គមចាត់ទុកថា បានបំពានច្បាប់របស់​ Twitter ។ ប៉ុន្តែ បណ្តាញសង្គមនេះមិនបានដកអត្ថបទ«ហិង្សា»របស់លោកត្រាំចេញឡើយ គ្រាន់តែបោះត្រាព្រមាន ហើយរក្សានៅដដែលឲ្យមហាជនបានឃើញ។
លោកត្រាំបានសរសេរនៅលើបណ្តាញសង្គមTwitter ថា​«​ក្រុមជនកាចសាហាវកំពុងតែបំផ្លាញ​ការគោរពដល់ជនរងគ្រោះGeorge Floyd ហើយខ្ញុំនិងមិនទុកឲ្យរឿងនោះកើតឡើងឡើយ ។ ខ្ញុំបាននិយាយទៅកាន់អភិបាលរដ្ឋTim Walz ថា កម្លាំងទាហាន សន្តិសុខ តែងរួមដំណើរជាមួយលោក បើទោះបីមានឧបសគ្គអ្វី​ក្តី។ យើងនឹងគ្រប់គ្រងស្ថានភាព នៅពេលមានការឆក់ប្លន់កើតឡើង​ អាវុធនិឹងផ្ទុះ»។
ស្ថានភាពផ្ទៃក្នុងទឹកដីអាមេរិក កាន់តែតានតឹង ក្នុងពេលការបោះឆ្នោតប្រធានាធិបតីអាមេរិក កាន់តែខិតជិតមកដល់ ។ លោកត្រាំ​ត្រូវបានគេចាត់ទុកថា​ជាប្រធានាធិបតី ដែលមានជម្លោះជាមួយអ្នកសារព័ត៌មាន ជាបន្តបន្ទាប់​។ នៅថ្ងៃទី​២៩ ខែឧសភានេះដែរ កម្លាំងសន្តិសុខក៏បានចាប់ខ្លួនអ្នករាយការណ៍ផ្ទាល់របស់បណ្តាញព័ត៌មាន​CNN ពេលកំពុងផ្សាយទិដ្ឋភាពបាតុកម្ម៕

ដោយ៖ធី រីណា