ស្ត្រីម្នាក់បើករថយន្តបុករះឡំប្រឺតា ៣គ្រឿងបន្តបន្ទាប់គ្នាបណ្តាលឱ្យបុរសម្នាក់រងរបួស

ភ្នំពេញ៖ ស្ត្រីម្នាក់រួមដំណើរជាមួយកូនប្រុសម្នាក់ទៀតបើករថយន្តស៊េរីទំនើបម៉ាកម៉ាស់ស្តាមួយគ្រឿងក្នុងល្បឿនលឿនបានរេចង្កូតទៅបុករះឡំប្រឺតា៣គ្រឿងបន្តបន្ទាប់គ្នាដែលចតនៅតាមចិញ្ចើមផ្លូវ បណ្ដាលឲ្យបុរសម្នាក់រងរបួស។

ហេតុការណ៍នេះកើតឡើងកាលពីម៉ោង៩ យប់ថ្ងៃទី ២៩ ខែឧសភា ឆ្នាំ២០២០ នៅតាមបណ្ដោយផ្លូវលេខ ១០១៥ ខាងមុខច្រកចូលបុរីជីបម៉ុង ក្នុងសង្កាត់ភ្នំពេញថ្មីខណ្ឌសែនសុខ រាជធានីភ្នំពេញ។

ប្រភពព័ត៌មាននៅកន្លែងកើតហេតុបានឲ្យដឹងថា មុនពេលកើតហេតុគេឃើញស្ត្រីម្នាក់រួមដំណើរជាមួយកូនប្រុសម្នាក់ទៀត បើករថយន្តស៊េរីទំនើបម៉ាកម៉ាស់ស្តាមួយគ្រឿងពណ៌ក្រហម ពាក់ស្លាកលេខភ្នំពេញ2AX-1268 ធ្វើដំណើរនៅតាមបណ្ដោយផ្លូវលេខ ១០១៥ ក្នុងទិសដៅពីជើងទៅត្បូងយ៉ាងលឿន ខណៈមកដល់ចំណុចកើតហេតុបានរេចង្កូតមកខាងស្តាំ ដៃជ្រុលទៅបុករះឡំប្រឺតាចំនួន៣គ្រឿង បន្តកន្ទុយគ្នាខ្ទាតឡំប្រឺតា២គ្រឿងមកកណ្ដាលផ្លូវគាបជាប់រថយន្តទៅមុខលែងរួចបណ្តាលឲ្យបុរសម្នាក់រងរបួសជើង។

បន្ទាប់ពីកើតហេតុសមត្ថកិច្ចមូលដ្ឋានបានចុះមកដល់នាំយករថយន្តបង្កហេតុនិងឡំប្រឺតាទាំង៣គ្រឿងទៅរក្សាទុកនៅអធិការដ្ឋានគរបាលខណ្ឌសែនសុខរង់ចាំដោះស្រាយគ្នានៅពេលក្រោយ៕ជ្រោយពេជ្រ