សារព័ត៌មាន នគរវត្ត តែងតែនាំមុខគេជានិច្ច
ខេត្តបន្ទាយមានជ័យ៖ មនុស្សចំនួន៣នាក់បានរបួសបាក់ជើងនិង១នាក់ផ្សេងទៀតបែកភ្នែកម្ខាងក្នុងហេតុការណ៍គ្រោះថ្នាក់ចរាចរណ៍រថយន្តបុកម៉ូតូកាលពីវេលាម៉ោង៤និង២៥នាទីរសៀលថ្ងៃទី២៩ខែឧសភា ឆ្នាំ២០២០ លើផ្លូវលេខ២,៥៦៣ ចំណុចខាងកើតសាលាឆទានចម្ងាយ ១៥០ម ស្ថិតក្នុងភូមិព្រែវែង ឃុំគំរូ ស្រុកថ្មពួក ខេត្តបន្ទាយមានជ័យ ។
លោកអធិការនគរបាលស្រុកថ្មពួក សៅ សារឿនបានប្រាប់ថា នៅមុនពេលកើតហេតុគ្រោះថ្នាក់ចរាចរណ៍នេះមានម៉ូតូដឹកជ្រូក១គ្រឿងបានបត់កាត់ពីមុខរថយន្ត១គ្រឿងដែលកំពុងបើកបរក្នុងទិសដៅពីលិចទៅកើត ចំណែកម៉ូតូ១គ្រឿងទៀតកំពុងបើកបរក្នុងទិសដៅពីកើតទៅលិច ធ្វើឲ្យរថយន្តនិងម៉ូតូគេចពីម៉ូតូដឹកជ្រូកក៏បណ្ដាលឲ្យកើតមានគ្រោះថ្នាក់ចរាចរណ៍ មានអ្នករងរបួសធ្ងន់ បាក់ជើងចំនួន៣នាក់និងបែកភ្នែកម្ខាង១នាក់តែម្ដង។ក្រោយកើតហេតុគេឃើញសមត្ថកិច្ចចុះមកដល់ហើយហៅរថយន្តសង្គ្រោះមកដឹកអ្នករងរបួសទៅព្យាបាលនៅមន្ទីរពេទ្យបង្អែកស្រុកថ្មពួក ។ចំណែកឯម៉ូតូដឹកជ្រូកបានបើករត់គេខ្លួនបាត់។ រថយន្តរងគ្រោះបានរងការខូចខាតធ្ងន់ផ្នែកខាងនិងម៉ូតូមួយគ្រឿងទៀតខូចខាតទាំងស្រុង ។
លោកអធិការបានបញ្ជាក់ថា មូលហេតុដែលបង្កឲ្យរថយន្តនិងម៉ូតូបុកគ្នានេះ គឺបណ្តាលមកពីរថយន្តនិងម៉ូតូបានបើកគេចពីម៉ូតូដឹកជ្រូកដែលបត់កាត់ពីមុខ។ វត្ថុតាងរថយន្តនិងម៉ូតូនគរបាលជំនាញបានយកទីរក្សាទុកនៅអធិការដ្ឋាននគរបាលស្រុកថ្មពួក រង់ចាំធ្វើការដោះស្រាយនៅពេលក្រោយ៕ដោយ៖ វណ្ណា
