បុរសម្នាក់បើករថយន្តបុករថយន្តសណ្តោងទូកុងតឺន័រខ្ទេចមួយកំណាត់មុខបណ្តាលឲ្យស្រ្តីម្នាក់សន្លប់

ភ្នំពេញ៖ បុរសម្នាក់បើករថយន្តខ្វះការប្រុងប្រយ័ត្នរេចង្កូតទៅមុខរថយន្តកុងតឺន័របណ្ដាលឲ្យស្ត្រីជាម្ដាយក្មេកភ័យសន្លប់។ហេតុការណ៍កាលនេះកើតឡើងកាលពីម៉ោង ៨និង ២០ នាទីយប់ថ្ងៃទី ៤ ខែមិថុនាឆ្នាំ ២០២០ នៅតាមបណ្តោយផ្លូវ លេខ១៩៦២ ក្បែរប៉ុស្តិ៍នគរបាលក្រាំងធ្នង់  ក្នុងសង្កាត់ក្រាំងធ្នង់ ខណ្ឌសែនសុខ រាជធានីភ្នំពេញ។

ប្រភពព័ត៌មាននៅកន្លែងកើតហេតុបានឲ្យដឹងថា មុនពេលកើតហេតុគេឃើញបុរសម្នាក់រួមដំណើរជាមួយម្តាយក្មេកបានបើករថយន្តម៉ាកតូយ៉ូហាយឡេនឌ័រ ពណ៌ខ្មៅពាក់ស្លាកលេខភ្នំពេញ2P-4047 ធ្វើដំណើរតាមបណ្តោយផ្លូវ លេខ១៩៦២ ក្នុងទិសដៅពីកើតទៅលិច ខណៈមកដល់ចំណុចកើតហេតុបានរេចង្កូតទៅបុករថយន្តសណ្តោងទូកុងតឺន័រមួយគ្រឿងម៉ាកFUSO ក្បាលពណ៌បៃតង ពាក់ស្លាកលេខកំពង់ស្ពឺ3A-2258 ធ្វើដំណើបញ្ច្រាសទិសដៅគ្នាចំកង់រថយន្តខាងក្រោយពេញទំហឹងធ្វើឲ្យរថយន្តវិលមួយជុំខ្ទាតទៅចិញ្ចើមផ្លូវបណ្តាលស្ត្រីជាម្ដាយក្មេកភ័យសន្លប់ ចំណែករថយន្តខ្ទេចមួយកំណាត់មុខភ្លាមៗនោះបុរសជាកូនបានយកម្ដាយទៅសង្គ្រោះនៅមន្ទីរពេទ្យឯកជនមួយកន្លែងដោយខ្លួនឯង។

បន្ទាប់ពីកើតហេតុសមត្ថកិច្ចមូលដ្ឋានបានចុះមកដល់បានឲ្យភាគីទាំងសងខាងសម្របសម្រួលគ្នាដោយភាគីខាងរថយន្តកុងតឺន័រមិនមានការខូចខាតអ្វីក៏មិនបានទាមទារសំណងនោះដែររួចបានបន្តដំណើរទៅមុខទៀតបាត់ចំណែករថយន្តហាឡេនឌ័រសមត្ថកិច្ចប្រគល់ជូនម្ចាស់ស្ទួចយកទៅជួសជុលដោយខ្លួនឯង៕

ដោយ៖ជ្រោយពេជ្រ