សារព័ត៌មាន នគរវត្ត តែងតែនាំមុខគេជានិច្ច
អេស្ប៉ាញ៖ ខ្សែប្រយុទ្ធ Antoine Griezmann របស់ក្រុម Barcelona បានសារភាពថា វាពិតជាចំលែកខ្លាំងណាស់ក្នុងការលេងបាល់ទាត់ដោយគ្មានអ្នកគាំទ្រនៅអេស្ប៉ាញ។ នេះបើយោងតាមការចេញផ្សាយរបស់ Livescore កាលពីម្សិលមិញ។
Griezmann បាននិយាយថា គ្មានអ្វីដែលគួរឱ្យឆ្ងល់ទេដែលថាវានឹងមិនធម្មតាទេក្នុងការលេងជាមួយអ្នកគាំទ្រដែលមិនមានវត្តមានចូលរួមដោយសារតែ COVID-19 ។
កីឡាករសញ្ជាតិបារាំងរូបនេះបាននិយាយអំឡុងការសន្ទនានៅបណ្តាញ Twitch កាលពីថ្ងៃព្រហស្បតិ៍ថា “ការប្រកួតដំបូងនឹងមាននៅនៅក្លឹប Mallorca ប៉ុន្តែវាពិតជាចំលែកខ្លាំងណាស់ក្នុងការលេងដោយគ្មានទស្សនិកជន។ វានឹងជាលើកទី ១ ហើយដែលខ្ញុំបានជួបរឿងបែបនេះ” ។ បច្ចុប្បន្ន Griezmann ដែលរកបាន១៤គ្រាប់ក្នុង៣៧ប្រកួតនៅរដូវកាលនេះ ។
កីឡាករវ័យអាយុ៣៣ឆ្នាំ ខ្សែប្រយុទ្ធរបស់ Barcelonaរូបនេះបង្ហើបថា រូបគេបានត្រៀមខ្លួនរួចជាស្រេច ក្នុងការបញ្ចប់អាជីពខ្លួននៅ Major League Soccer សហរដ្ឋអាមេរិក កន្លែងកីឡាករល្បីៗជាច្រើនបាននឹងកំពុងលេង និងធ្លាប់លេង។ ប៉ុន្តែខ្សែប្រយុទ្ធបារាំងរូបនេះនៅតែចង់ឈ្នះពានផ្សេងទៀតជាមួយ Barcalona រហូតដល់ឆ្នាំ២០២២ ។
គួរបញ្ជាក់ថា ថ្នាក់ដឹកនាំលីកកំពូលអេស្ប៉ាញ La Liga នឹងបន្តរដូវកាលរបស់ពួកគេនៅថ្ងៃទី១៣ ខែមិថុនា ខាងមុខចំពេលមានការរីករាលដាលនៃជំងឺឆ្លងកូវីដ-១៩ដែលបណ្តាលឱ្យការប្រកួតត្រូវបានផ្អាកកាលពីខែមីនា។ នៅសល់១១ប្រកួតទៀតត្រូវលេងនៅ La Liga ក្រុម Barcelona នាំមុខ២ពិន្ទុលើគូប្រជែងលេខ២ Real Madrid ៕ដោយ៖ភារៈ
