រថយន្តនីស្សាន់ណាវ៉ារ៉ាបុកស្រ្តីម្នាក់ស្លាប់នៅនឹងកន្លែង

ខេត្តបន្ទាយមានជ័យ៖ ស្ត្រីម្នាក់បានស្លាប់ភ្លាមៗនៅនឹងកន្លែងកើតហេតុ ដោយសារគ្រោះថ្នាក់ចរាចរណ៍ដែលបានកើតឡើងនៅវេលាម៉ោង១០និង៥៥នាទីព្រឹកថ្ងៃទី០៦ខែមិថុនា ឆ្នាំ២០២០ នៅចំណុចខាងត្បូងស្ថានីយប្រេងស៊ុនចន្ទ្រាចម្ងាយ៥០ម៉ែត្រ ស្ថិតក្នុងភូមិកកោះ ឃុំស្លក្រាម ស្រុកស្វាយចេក ខេត្តបន្ទាយមានជ័យ។ 

 លោកជា ស្លូញ អធិការនគរបាលស្រុកស្វាយចេកបានប្រាប់ថា នៅមុនពេលកើតហេតុមានម៉ូតូ១គ្រឿងម៉ាកហុងដាឌ្រីម សេ១២៥ ពណ៌ខ្មៅ  ពាក់ស្លាកលេខ ប.មានជ័យ1Q-7150 បើកបរដោយឈ្មោះសុខ សុភាព ភេទស្រី អាយុ៦០ឆ្នាំ រស់នៅភូមិខ្លែងពណ៍ជើង ឃុំស្លក្រាម ស្រុកស្វាយចេក  បានបើកក្នុងទិសដៅពីជើងទៅត្បូង មានពាក់មួកសុវត្ថិភាព។ ចំណែករថយន្តពាក់ស្លាកលេខបាត់ដំបង2C-9893 បើកក្នុងទិសដៅពីត្បួងទៅជើងក្នុងល្បឿនលឿន ពេលមកដល់ផ្លូវកោងក៏បុកម៉ូតូជនរងគ្រោះបណ្តាលឱ្យអ្នកបើកបរម៉ូតូស្លាប់នៅនឹងកន្លែងកើតហេតុតែម្ដង រីឯអ្នកបើកបររថយន្តក្រោយកើតហេតុបានរត់គេចខ្លួនបាត់។

  លោកអធិការបានបញ្ជាក់ថា ចំណែកម៉ូតូនិងរថយន្តខូចខាតធ្ងន់ទាំង២គ្រឿងត្រូវបានកម្លាំងនគរបាលជំនាញចរាចរណ៍យកមករក្សាទុកនៅអធិការដ្ឋាននគរបាលស្រុក ដើម្បីរកម្ចាស់រថយន្តមកដោះស្រាយនៅពេលក្រោយ ។

ចំពោះសពជនរងគ្រោះក្រោយពីធ្វើកំណត់ហេតុរួចសមត្ថកិច្ចបានប្រគល់ជូនសាច់ញាតិយកទៅធ្វើបុណ្យតាមប្រពៃណី៕

ដោយ៖វណ្ណា