សារព័ត៌មាន នគរវត្ត តែងតែនាំមុខគេជានិច្ច
បារាំង៖នៅថ្ងៃទី៩ ខែមិថុនា រដ្ឋមន្ត្រីក្រសួងហិរញ្ញវត្ថុបារាំង លោក Bruno Le Maire បានប្រកាសថា រដ្ឋាភិបាល នឹងផ្តល់កញ្ចប់ជំនួយជាទឹកប្រាក់ ១៥ ពាន់លានអឺរ៉ូ (១៦,៩ពាន់លានដុល្លារអាមេរិក)ជួយដល់វិស័យអាកាសចរណ៍នៅក្នុងប្រទេសនេះដែលជួបវិបត្តិដោយសារកូវីដ-១៩។
មានប្រសាសន៍នៅក្នុងសន្និសីទកាសែតលោក Bruno Le Maire បានបញ្ជាក់ថា ជំនួយខាងលើ និងជួយដល់វិស័យអាកាសចរណ៍ ដំណើរការបានល្អឡើងវិញ ក្រោយ កូវីដ-១៩ បានបញ្ចប់ទៅ។ ក្នុងចំណោមប្រាក់ជំនួយទាំងនោះ មាន៧ពាន់លានអឺរ៉ូសម្រាប់ក្រុមហ៊ុនអាកាសចរណ៍បារាំង Air France-KLM ដែលបានប្រកាសម្តងរួចមកហើយនាពេលកន្លងមក។
រដ្ឋមន្ត្រី Bruno Le Maire បានបញ្ជាក់ថា គម្រោងជួយសង្គ្រោះខាងលើ នឹងជួយដល់វិស័យអាកាសចរណ៍ដែលរងការខាតបង់ច្រើនជាងគេដោយកូវីដ-១៩ កាន់តែប្រសើរឡើង និប្រកួតប្រជែងជាងមុន។លោកបន្តទៀតថា ប្រសិនបើមិនមានការជួយអន្តរគមន៍ពីរដ្ឋាភិបាលនោះ ការងារនៅក្នុងវិស័យនេះដល់ទៅ ១/៣ ត្រូវបាត់បង់ (ស្មើ១សែននាក់ក្នុងចំណោម៣សែននាក់ធ្វើការក្នុងវិស័យអាកាសចរណ៍ត្រូវបាត់បង់ការងារ)។
គម្រោងជួយសង្គ្រោះដល់វិស័យ អាកាសចរណ៍ ត្រូវបានប្រកាសក្រោយពេលប្រធានាធិបតី Emmanuel Macron សន្យាថានឹងចំណាយប្រាក់១ពាន់លានអឺរ៉ូជួយដល់វិស័យផលិតរថយន្ត ក្នុងប្រទេសបារាំង ដើម្បីផលិតរថយន្ត ដើរដោយថាមពលអគ្គិសនី កាត់បន្ថយជាតិពុលក្នុងបរិយាកាស៕ដោយ៖ធី រីណា
