សារព័ត៌មាន នគរវត្ត តែងតែនាំមុខគេជានិច្ច
តាមតួលេខស្តីពីចំនួនអ្នកឆ្លងកូវីដ-១៩នៅក្នុងប្រទេសរុស្ស៊ីគឺឈរលំដាប់លេខពីរនៅលើពិភពលោក ប៉ុន្តែចំនួនអ្នកស្លាប់ដោយកូវីដ-១៩វិញមានចំនួនទាបបំផុត។
អ្នកនាំពាក្យប្រធានាធិបតីរុស្ស៊ី លោកDmitry Peskov បានលើកឡើងពីការវិភាគរបស់អង្គការសុខភាពពិភពលោកWHO ដែលថា ចំនួនអ្នកស្លាប់និងឆ្លងនៅក្នុងប្រទេសរុស្ស៊ីគឺជារឿងខុសប្រក្រតី។ លោកDmitry Peskov បានបញ្ជាក់ថាគ្មានអ្វីដែលសង្ស័យពីតួលេខដែលរុស្ស៊ីបានប្រកាសនោះឡើយ។
លោកDmitry Peskov បន្តទៀតថា ក្រុមជំនាញនឹងបកស្រាយពីមូលហេតុឱ្យបានច្បាស់ថាហេតុអ្វីបានជារុស្ស៊ីមានអ្នកស្លាប់តិច ដោយកូវីដ-១៩។
នៅក្នុងសន្និសីទកាសែត នៅទីក្រុងហ្សឺណែវ នាពេលកន្លងមក ប្រធានគ្រប់គ្រង ស្ថានភាពអាសន្ន របស់អង្គការសុខភាពពិភពលោក Michael Ryan បានបញ្ជាក់ថា ចំនួនអ្នកស្លាប់នៅក្នុងប្រទេសរុស្ស៊ី មានចំនួនទាបបើប្រៀបធៀបតួលេខនៃអ្នកឆ្លង។
គិតត្រឹមថ្ងៃទី១២ខែមិថុនា រុស្ស៊ីមានអ្នកឆ្លងកូវីដ-១៩ដល់ទៅជាង៥១១ពាន់នាក់ ឈរលំដាប់ទីពីរលើពិភពលោក ចំណែកអ្នកស្លាប់វិញ មានតែ៦.៧១៥ នាក់ប៉ុណ្ណោះ។ចំណែកអ្នកជាសះស្បើយវិញមាន ២៦៩.៣៧០នាក់ ៕ដោយ៖ធី រីណា
