សារព័ត៌មាន នគរវត្ត តែងតែនាំមុខគេជានិច្ច
លោក Mikel Arteta គ្រូបង្វឹកក្រុមកាំភ្លើងធំ Arsenal បាននិយាយថា លោកពិតជាមានភាពវិជ្ជមានក្នុងការយល់ព្រមបន្តកុងត្រាថ្មីជាមួយខ្សែប្រយុទ្ធវ័យ៣០ឆ្នាំ Pierre-Emerick Aubameyang ។
កិច្ចព្រមព្រៀងបច្ចុប្បន្នរបស់ Aubameyang នឹងត្រូវបញ្ចប់នៅខែមិថុនា ឆ្នាំ២០២១ ហើយលោក Arteta និយាយថាក្លឹបត្រូវបង្ហាញគាត់ពីមូលហេតុដែលគាត់គួរស្នាក់នៅជាមួយក្រុមកាំភ្លើងធំបន្តទៀត ។ កីឡាកររូបនេះត្រូវការមានអារម្មណ៍ថា មានតម្លៃគាត់ត្រូវមានអារម្មណ៍ថាគាត់ជារបស់យើងហើយយើងចង់បានគាត់ ។
លោក Arteta បានបន្ថែមថា “ខ្ញុំគិតថានៅពេលនេះខ្ញុំពិតជារីករាយខ្លាំងណាស់ជាមួយនឹងរបៀបដែលគាត់សំដែងនិងមានឥរិយាបទ។ ខ្ញុំពិតជាមានទំនាក់ទំនងល្អជាមួយគាត់ហើយយើងអាចពិភាក្សាគ្នាទល់មុខគ្នាបានច្រើន។ រហូតមកដល់ពេលនេះខ្ញុំដឹងថាខ្ញុំគិតថាគាត់សប្បាយចិត្តខ្លាំងណាស់នៅក្លឹប” ។
ទោះយ៉ាងណាខណៈពេលដែលលោក Arteta នៅតែមានសុទិដ្ឋិនិយមជាមួយ Aubameyang បានប្រាប់កម្មវិធីបាល់ទាត់បារាំង Telefoot ថា គាត់ មិនមានការផ្តល់ជូនថ្មីៗនេះទេពីក្លឹប។ លោកអះអាងថា “ខ្ញុំបាននិយាយទៅកាន់ក្លឹបកាលពីប៉ុន្មានខែមុនហើយពួកគេដឹងថាហេតុអ្វីបានជាមិនទាន់មានរឿងអ្វីកើតឡើង” ។
កាលពីខែមីនាមុនពេលការព្យួរលីគក្នុងពេលមានជំងឺរាតត្បាតកូវីដ-១៩ លោក Arteta បាននិយាយថា គាត់ចង់រក្សា Aubameyang ទោះស្ថិតក្នុងកាលៈទេសៈណាក៏ដោយ ហើយក្លឹបចាំបាច់ត្រូវពិភាក្សាអំពីកិច្ចព្រមព្រៀងថ្មីជាមួយប្រធានក្រុមរបស់ពួកគេមុនពេលបញ្ចប់រដូវកាល។
កាលពីចុងខែឧសភាកន្លងទៅមានក្លឹប Barcelona និង Inter Milan ត្រូវបានគេយល់ថាចាប់អារម្មណ៍ក្នុងការផ្ទេរកីឡាករខ្សែប្រយុទ្ធ Aubameyang រូបនេះ។
សូមបញ្ជាក់ថា ខ្សែប្រយុទ្ធ Aubameyang រកបាន៦១គ្រាប់ក្នុងការបង្ហាញខ្លួន៩៧ប្រកួតឱ្យក្រុមកាំភ្លើងធំ Arsenal ។ ក្រុម Arsenal ដែលឈរនៅលំដាប់ទី៩ក្នុងតារាងលីគកំពូលអង់គ្លេស នឹងធ្វើដំណើរទៅទឹកដី Manchester City ដែលឈរលំដាប់ទី២នៅថ្ងៃពុធនេះនៃការវិលត្រឡប់មកវិញនៃក្របខ័ណ្ឌ Premier League ៕ដោយ៖ភារៈ
