ក្មេងប្រុស៣នាក់ជិះម៉ូតូបត់ឆ្វេងមិនប្រយ័ត្នត្រូវ រថយន្តកុងតឺន័របុកកិនកល់ជាប់ម៉ូតូពីក្រោម

ភ្នំពេញ ៖ ពិតជាសំណាងមែនដោយក្មេងប្រុសតូចៗចំនួន៣នាក់ជិះម៉ូតូឌុបគ្នាឆ្លងផ្លូវមិនបានប្រយ័ត្ន ត្រូវបានរថយន្តកុងតឺន័របើកបញ្ច្រាស់ទិសបុកកិនកល់ជាប់ម៉ូតូនៅពីក្រោម សំណាងល្អក្មេងទាំង៣នាក់ផ្លោងខ្ទាតចេញផុតពីរថយន្ត គ្រាន់តែរលាត់ដៃជើងប៉ុណ្ណោះ កាលពីវេលាម៉ោង៩និង៣០នាទីព្រឹក ថ្ងៃទី១៧ ខែមិថុនា ឆ្នាំ២០២០ នៅតាមផ្លូវ៣០ម៉ែត្រ ភូមិតំណាក់ត្រយឹង សង្កាត់ចោមចៅ២ ខណ្ឌពោធិសែនជ័យ ។

តាមប្រភពនៅកន្លែងបានឲ្យដឹងថា ៖ មុនកើតហេតុ មានក្មេងប្រុស៣នាក់ជិះម៉ូតូមួយគ្រឿងម៉ាក ហុងដា សេ១២៥ ស៊េរី២០១៣ ពណ៌ខ្មៅ ពាក់ស្លាកលេខ ភ្នំពេញ 1CF-7501 ឌុបគ្នាធ្វើដំណើរពីលិចទៅកើត លុះមកដល់ចំណុចខាងលើ ក៏បានបត់ឆ្វេង ដោយមិនប្រុងប្រយ័ត្ន ត្រូវបានរថយន្តកុងតឺន័រ ម៉ាកហុីយ៉ាន់ដាយ ពណ៌លឿង ដែលម្ចាស់ដោះយកស្លាកលេខចេញបាត់ បើកពីកើតទៅលិច ចាប់ហ្វ្រាំងមិនទាន់ជ្រុលទៅបុក បណ្តាលឲ្យម៉ូតូកល់ជាប់នៅពីក្រោមកង់រថយន្ត។ ចំណែកក្មេងៗទាំង៣នាក់ផ្លោងខ្ទាតចេញផុត រងរបួសស្រាល ។

ពលរដ្ឋនៅកន្លែងកើតហេតុ រិៈគន់ផងដែរដល់ឪពុកម្តាយ អាណាព្យាបាលក្មេង កោតតែចេះបណ្តែតបណ្តោយឲ្យកូនចៅ មិនទាន់គ្រប់អាយុ បើកបរយានជំនិះ បញ្ជាដៃចង្កូតយានយន្ត ដែលប្រឈមគ្រោះថ្នាក់ បំផុត។

ករណីខាងលើ ក្រោយកើតហេតុ សមត្ថកិច្ចចុះទៅ បាញ់ថ្នាំនិងយករថយន្ត ម៉ូតូចេញទៅដាក់កៀនខាង ផ្តល់ឱកាសឲ្យភាគីសងខាងនិយាយសម្របសម្រួលគ្នា ដោយភាគីខាងរថយន្តជួយចេញសងថ្លៃខូចខាតម៉ូតូដើម្បីបញ្ចប់រឿងនៅកន្លែងកើតហេតុ នោះផងដែរ៕ដោយ៖សុខា សែនជ័យ