សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ មានជនសង្ស័យ២នាក់បានជិះម៉ូតូមួយគ្រឿងធ្វើសកម្មភាពឆក់យកកាបូបពីស្ត្រីម្នាក់ ខណៈកំពុងជិះម៉ូតូជាមួយប្តីនិងកូនតែមិនបានសម្រេច បណ្តាលឲ្យដួលម៉ូតូទាំងជនរងគ្រោះ និងជនសង្ស័យ កាលពីវេលាម៉ោង៩និង ៣០នាទីយប់ថ្ងៃទី១៨ ខែមិថុនា ឆ្នាំ ២០២០ នៅតាមបណ្ដោយផ្លូវកម្ពុជាក្រោម ខាងលិចស្តុបណានជីង ក្នុងសង្កាត់មិត្តភាព ខណ្ឌ៧មករា រាជធានីភ្នំពេញ។
ជនរងគ្រោះជាប្តីមានឈ្មោះ គឹម យ៉ាត់ អាយុ៤១ឆ្នាំ មានមុខរបរធ្វើការនៅកុងស៊ីកាប់ជ្រូក ស្នាក់នៅសង្កាត់ទឹកថ្លា ខណ្ឌសែនសុខ មានស្រុកកំណើតនៅ ស្រុកស្វាយចេក ខេត្តបន្ទាយមានជ័យ។ចំណែកប្រពន្ធមានឈ្មោះញ៉ឹក ម៉ាម អាយុ ២៨ឆ្នាំ មុខរបរកម្មការិនីរោងចក្រ ស្នាក់នៅជាមួយគ្នា មានស្រុកកំណើត នៅភូមិ ឃុំ ជាមួយគ្នា រីឯកូនស្រីមិនស្គាល់អត្តសញ្ញាណនោះទេ។
តាមសម្ដីជនរងគ្រោះជាប្រពន្ធបានប្រាប់ឲ្យដឹងថា មុនកើតហេតុរូបគាត់ទាំងបីនាក់បានជិះម៉ូតូមួយគ្រឿងម៉ាកហុងដាស្គូពីពណ៌ក្រហម ពាក់ស្លាកលេខភ្នំពេញ1FW-7944 ទើបនឹងចេញពីហូបមីហឹរមួយកន្លែងក្នុងគោលបំណងត្រឡប់ទៅកន្លែងស្នាក់នៅវិញដោយធ្វើដំណើរតាមបណ្តោយផ្លូវកម្ពុជាក្រោមពីកើតទៅលិច។ លុះមកដល់ចំណុចកើតហេតុខាងលើក៏លេចមុខជនសង្ស័យចំនួន២នាក់ជិះម៉ូតូម៉ាកហុងដាឌ្រីមសេ១២៥ ស៊េរីឆ្នាំ២០១៨ មួយគ្រឿងមិនចាំស្លាកលេខ ធ្វើដំណើរមកពីខាងក្រោយរួចធ្វើសកម្មភាពឆក់យកកាបូបស្ត្រីជាប្រពន្ធដែលកំពុងស្ពាយចំហៀងតែមិនបានសម្រេចត្រូវជនរងគ្រោះចាប់ទាញយកមកវិញបណ្ដាលឲ្យដួលម៉ូតូទាំងជនសង្ស័យនិងជនរងគ្រោះអូសទៅលើថ្នល់ទាំងអស់គ្នា ។ ភ្លាមៗនោះជនសង្ស័យក៏បាននាំគ្នាលើកម៉ូតូជិះគេចខ្លួនបាត់ស្រមោលទៅ។ ចំណែកជនរងគ្រោះទាំង៣នាក់បានរងរបួសដៃជើងទាំងអស់គ្នា តែមិនដល់ថ្នាក់ធ្ងន់ធ្ងរនោះឡេីយ ។
ក្រោយកើតហេតុ សមត្ថកិច្ចមូលដ្ឋានបានចុះមកដល់ ហេីយទាក់ទងទៅរថយន្តសង្គ្រោះបន្ទាន់ផងដែរ តែជនរងគ្រោះមិនបានទៅមន្ទីរពេទ្យនោះទេ ទេីបគ្រូពេទ្យសម្រេចចិត្តជួយលាងរបួសនៅនឹងកន្លែងតែម្ដង ។ បន្ទាប់មកសមត្ថកិច្ចបានឲ្យជនរងគ្រោះទៅដាក់ពាក្យបណ្ដឹងនៅប៉ុស្តិ៍នគរបាលរដ្ឋបាលសង្កាត់មិត្តភាព តែជនរងគ្រោះមិនទៅនោះទេ រួចបាននាំគ្នាឡើងជិះម៉ូតូត្រឡប់ទៅកន្លែងស្នាក់នៅវិញដេីម្បីសម្រាកព្យាបាលដោយខ្លូនឯង៕
ដោយ៖ភារ៉ា ដង្កោ
