សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង៖ បុរសម្នាក់បែកក្បាលហូរឈាមស្លាប់នៅនឹងកន្លែង និងម្នាក់ទៀតរងរបួសធ្ងន់ដោយសារគ្រោះថ្នាក់ចរាចរណ៍រវាងគោយន្តដែលបើកមិនប្រកាន់ស្ដាំទៅបុកអ្នកជិះម៉ូតូបញ្ច្រាសគ្នាយ៉ាងពេញទំហឹងលាន់សូរដូចរន្ទះបង្កការភ្ញាក់ដល់អ្នកភូមិទាំងព្រឹក។
ហេតុការណ៍នេះបានកើតឡើងកាលពីវេលាម៉ោង៨និង៨នាទីព្រឹក ថ្ងៃទី១៩ ខែមិថុនា ឆ្នាំ២០២០ នៅលើផ្លូវលេខ ៣១៥ ស្ថិតក្នុងភូមិ អណ្ដូងតាសី សង្កាត់ ព្រៃឆ្លាក់ ក្រុងស្វាយរៀង ។
បើតាមសមត្ថកិច្ចនគរបាលក្រុងស្វាយរៀងបានឱ្យដឹងថា បុរសដែលស្លាប់មានឈ្មោះ មាស យ៉ា អាយុ៥៨ឆ្នាំ រស់នៅភូមិពោធិ៍រាជ ឃុំពោធិ៍រាជ ស្រុក ស្វាយជ្រំ ខេត្តស្វាយរៀង និងអ្នករួមដំណើរឈ្មោះ សុខ សុីថា ភេទ ប្រុស អាយុ៤៩ឆ្នាំ មុខរបរកសិករ រស់នៅភូមិឃុំជាមួយគ្នា ។
ចំណែកអ្នកបើកគោយន្តបង្កហេតុត្រូវបានគេស្គាល់ឈ្មោះសុខ មករា អាយុ ២៥ ឆ្នាំ មុខរបរបើកគោយន្ដដឹកដី រស់នៅភូមិ មេលោង សង្កាត់ចេក ក្រុងស្វាយរៀង ខេត្ត ស្វាយរៀង ត្រូវបានសមត្ថកិច្ចឃាត់ខ្លួនយកមកសាកសួរផងដែរ។
តាមសាក្សីបានឱ្យដឹងថា មុនកើតហេតុមានបុរស២នាក់បានជិះម៉ូតូមួយគ្រឿងម៉ាកហុងដាសេ១២៥ ពណ៌ ខ្មៅ ពាក់ស្លាកលេខ ស្វាយរៀង ១C-៦៥៣១ ក្នុងទិសដៅពីត្បូងមកជើងលើផ្លូវលេខ ៣១៥ ខណៈនោះស្រាប់តែមានអ្នកបើកគោយន្តមិនប្រកាន់ស្ដាំបើកបញ្ច្រាសគ្នាមកបុកពេញទំហឹងបង្កការភ្ញាក់ផ្អើលតែម្ដង។
ក្រោយមកអ្នករងរបួសធ្ងន់ត្រូវបានដឹកមកសង្គ្រោះនៅមន្ទីរពេទ្យបង្អែកខេត្ត។ចំណែកមធ្យោបាយធ្វើដំណើរទាំង២គ្រឿងសមត្ថកិច្ចធ្វើការវាស់វែងនិងយកមករក្សាទុកនៅអធិការដ្ឋានក្រុងស្វាយរៀង ។
រីឯអ្នកស្លាប់សមត្ថកិច្ចប្រគល់ឱ្យក្រុមគ្រួសារយកទៅធ្វើបុណ្យតាមប្រពៃណី ចំពោះអ្នកបើកបរគោយន្ដកែច្នៃត្រូវបានឃាត់ខ្លួននៅអធិការដ្ឋានក្រុងស្វាយរៀង ដើម្បីរៀបចំសំណុំរឿងចាត់ការបន្ដតាមច្បាប់ ៕ យឹម សុថាន
