សារព័ត៌មាន នគរវត្ត តែងតែនាំមុខគេជានិច្ច
សារព័ត៌មានរ៉យទ័រនៅថ្ងៃទី១៩ខែមិថុនា បានផ្សាយថា រដ្ឋាភិបាលអាមេរិកបានចូលរួមរំលែកទុក្ខដល់ទាហានឥណ្ឌា២០នាក់ដែលស្លាប់ ក្នុងការប៉ះទង្គិចគ្នា ដោយប្រើដំបងដុំថ្ម វាយតប់គ្នាកាលពីយប់ថ្ងៃទី១៥ ខែមិថុនា។ រដ្ឋមន្ត្រីការបរទេសអាមេរិក លោកMike Pompeo បានបញ្ជាក់ថា «យើងសូមចូលរួម រំលែកទុក្ខដល់ពលរដ្ឋឥណ្ឌា ដែលបានបាត់បង់ទាហាន ដោយការប៉ះទង្គិចគ្នាជាមួយភាគីចិន»។
ប្រព័ន្ធផ្សព្វផ្សាយឥណ្ឌាបានផ្សាយថា មានទាហានចិន៤៥នាក់ស្លាប់។ ភាពតានតឹងនៅព្រំដែននៅតែបន្តបើទោះបីរដ្ឋាភិបាលប្រទេសទាំងពីរ បានព្រមព្រៀងគ្នាបញ្ចប់ភាពតានតឹងក្តី។
វិវាទនៅព្រំដែនកំពុងក្លាយទៅជាបញ្ហាជាតិសាសន៍ដោយពលរដ្ឋឥណ្ឌាជាច្រើនថ្ងៃកន្លងមក បានអំពាវនាវឲ្យពលរដ្ឋទាំងអស់ឈប់ប្រើប្រាស់ទំនិញឬសម្ភាររបស់ចិន។ ការរាលដាលដល់វិស័យសេដ្ឋកិច្ចពាណិជ្ជកម្ម នឹងធ្វើឲ្យប្រទេសទាំងពីរខាតបង់សេដ្ឋកិច្ចកាន់តែច្រើន។
នៅពេលនេះដែរកម្លាំងទាហានអាកាសឥណ្ឌា បានបញ្ជូនយន្តហោះបំពាក់កាំជ្រួចមីស៊ីលទំនើបបំផុត Brahmos ទៅកាន់តំបន់ព្រំដែនដែលមានវិវាទជាមួយចិន។ មិនតែប៉ុណ្ណោះប្រព័ន្ធផ្សព្វផ្សាយឥណ្ឌាបានផ្សាយថា កម្លាំងទាហានជើងគោក ជើងទឹក និងអាកាសបានត្រៀមលក្ខណៈរួចរាល់ដើម្បីតបតជាមួយចិន ប្រសិនបើផ្ទុះសង្គ្រាមជាទ្រង់ទ្រាយធំនៅព្រំដែននោះ ៕ធី រីណា
