សារព័ត៌មាន នគរវត្ត តែងតែនាំមុខគេជានិច្ច
អន្តរជាតិ៖ ហេតុការណ៍ដ៏រន្ធត់មួយបានកើតឡើងនៅក្នុងទីក្រុង AuckLand នៃប្រទេសនូវែលសេឡង់ ខណៈដែលខ្មាំងកាំភ្លើងបានបាញ់ប្រហារទៅលើប៉ូលិស២នាក់ បណ្ដាលឲ្យម្នាក់ស្លាប់ និងម្នាក់ទៀតរងរបួសធ្ងន់ ពេលពួកគាត់កំពុងត្រួតពិនិត្យយានយន្តតាមដងផ្លូវ ។ភ្លាមនោះជនសង្ស័យដែលបាញ់ប៉ូលិស បានរត់គេចខ្លួនក្នុងរថយន្តមួយ តែជាង៤ម៉ោងក្រោយហេតុនេះត្រូវបានក្រុមប៉ូលិសសម្រុកចូលផ្ទះមួយកន្លែង និងចាប់ឃាត់ខ្លួនបុរស២នាក់ផងដែរ ។ នេះបើតាមប្រភពព័ត៌មានក្នុងស្រុក nzherald.com.nz បានចេញផ្សាយនៅថ្ងៃទី១៩ខែមិថុនា ឆ្នាំ២០២០នេះ ។
បើតាមទីភ្នាក់ងារព័ត៌មាន AFP ដកស្រង់ប្រភពពីមន្រ្តីប៉ូលិសនូវែលសេឡង់បាននិយាយថា ពួកគេបានធ្វើការងារត្រួតពិនិត្យយានយន្តតាមផ្លូវដូចសព្វដង កាលពីព្រឹកថ្ងៃទី១៩ ខែមិថុនា ឆ្នាំ២០២០ ហើយនៅពេលនោះស្រាប់តែមនុស្សម្នាក់បានបើកការបាញ់ប្រហារមកលើពួកគេ មុនពេលបើករថយន្តចេញទៅ ។ ដោយរថយន្តជនសង្ស័យ ថែមទាំងបើកបុកមនុស្សម្នាក់នៅកន្លែងកើតហេតុផងដែរ។
លោក Andrew Coster ស្នងការប៉ូលិសនូវែលសេឡង់ និយាយថា “ វាគ្មានអ្វីកើតឡើងខុសធម្មតាឡើយ នៅពេលរថយន្តជនសង្ស័យនោះចតឲ្យប៉ូលិសត្រួតពិនិត្យ ដោយពួកគេមិនមានទាំងកាំភ្លើងជាប់ខ្លួនផងដែរ “ ។លោកបន្ថែមថា ជាធម្មតាប៉ូលិសនូវែលសេឡង់ ពុំទម្លាប់កាន់កាំភ្លើងឡើយតែទុកនៅក្នុងរថយន្ត។
លោក Coster អះអាងប្រាប់សារព័ត៌មានក្នុងស្រុកយ៉ាងដូច្នេះថា៖«នេះគឺជាស្ថានភាពដ៏គួរឲ្យតក់ស្លុតបំផុត ។ នេះគឺជាព័ត៌មានអាក្រក់បំផុតដែលប៉ូលិសនិងក្រុមគ្រួសារពួកគេទទួលបាន»។ លោកស្នងការ Coster បញ្ជាក់ថា មន្ត្រីប៉ូលិសទី២ដែលមានរបួសធ្ងន់នោះ កំពុងសម្រាកព្យាបាលនៅមន្ទីរពេទ្យខណៈប្រជាជនម្នាក់ដែលត្រូវជនសង្ស័យបើកបុកនៅកន្លែងកើតហេតុនោះ ក៏សម្រាកនៅមន្ទីរពេទ្យដោយមានរបួសស្រាល ។
ដោយឡែកអ្នកស្រីនាយករដ្ឋមន្ត្រី Jacinda Ardern នៅក្នុងសេចក្តីថ្លែងការណ៍ បាននិយាយថា ព័ត៌មាននេះ គឺជារឿងតក់ស្លុតបំផុតសម្រាប់ប្រជាជាតិ ។ អ្នកស្រីសង្កត់ធ្ងន់ថា៖«បាត់បង់ប៉ូលិសម្នាក់ គឺបាត់បង់មនុស្សម្នាក់ដែលធ្វើការបម្រើយើងទាំងអស់គ្នា ប៉ុន្តែក៏ជាសមាជិកគ្រួសារយើងមនុស្សដែលយើងស្រលាញ់ និងមិត្ត»៕ដោយ៖ស តារា
