សារព័ត៌មាន នគរវត្ត តែងតែនាំមុខគេជានិច្ច
អន្តរជាតិ៖ យោងតាមសេចក្តីថ្លែងការណ៍ថ្មីៗនេះ របស់លោក នារិន្ទ្រា ម៉ូឌីនាយករដ្ឋមន្ត្រីឥណ្ឌា បានស្តីបន្ទោសភាគីចិនថាចង់ផ្លាស់ប្ដូរទម្រង់ដើមនៃព្រំដែនរបស់ប្រទេសទាំងពីរ ដោយឆ្លងកាត់ខ្សែបន្ទាត់ខណ្ឌចែកព្រំដែន Line of Actual Control ខណៈបន្ទាត់ខណ្ឌសីមារវាងប្រទេសទាំងពីរ ត្រូវទទួលស្គាល់ ។ ប៉ុន្តែលោកសង្កត់ធ្ងន់៖«ចិនក៏បានបដិសេធសំណើឥណ្ឌាឲ្យបញ្ឈប់ទង្វើនេះផងដែរ»។ បើតាមទីភ្នាក់ងារព័ត៌មាន Reuters លោកនាយករដ្ឋមន្ត្រី អះអាងទៀតថា ឥណ្ឌានឹងមិនអនុញ្ញាតការផ្លាស់ប្តូរឯកតោភាគីណាមួយចំពោះព្រំដែនដែលកំពុងមានជម្លោះឡើយ។
ដោយឡែករដ្ឋាភិបាលចិន នៅថ្ងៃសៅរ៍ទី២០ ខែមិថុនា តាមរយៈក្រសួងការបរទេសខ្លួន បានចោទប្រកាន់កងទ័ពឥណ្ឌាថាប្រព្រឹត្តសកម្មភាពបង្ករឿងដោយចេតនាក្នុងតំបន់ Himalayan ដែលកំពុងតានតានស្រាប់។ ក្នុងបណ្ដាញសង្គម Twitter អ្នកនាំពាក្យក្រសួងការបរទេសចិនលោក Zhao Lijian បាននិយាយថា ជ្រលង Galwan Valley គឺស្ថិតនៅខាងចិននៃបន្ទាត់ព្រំដែន ហើយលោកអះអាងថា ខាងទ័ពឥណ្ឌាបានធ្វើផ្លូវ និងស្ពានជាដើមក្នុងតំបន់នេះ តាំងពីខែមេសាមក។
លោក Zhao សង្កត់ធ្ងន់ថា ទ័ពឥណ្ឌា បានឆ្លងបន្ទាត់ព្រំដែន Line of Actual Control ហើយបានវាយប្រហារលើមន្ត្រីចិន និងទាហានចិនដែលបានទៅទីនោះដើម្បីចរចា។ ការណ៍នេះហើយទើបបង្កជាជម្លោះដ៏ស្រួចស្រាល់ដែលឈានដល់មានករណីស្លាប់បែបនេះ។
យ៉ាងណាមិញ អ្នកនាំពាក្យ ក្រសួងការបរទេសឥណ្ឌា Anurag Srivastava បានទាត់ចោលការចោទថា ឥណ្ឌាបំពានបន្ទាត់ខណ្ឌព្រំដែនLine of Actual Control ហើយសង្កត់ធ្ងន់ថា ការលើកឡើងរបស់ចិន ពុំអាចទទួលយកបានឡើយ។
ដោយឈរខាងឥណ្ឌា រដ្ឋមន្ត្រីការបរទេសអាមេរិក បានរិះគន់ចិនសម្រាប់បង្កភាពតានតឹងផ្នែកព្រំដែនជាមួយក្រុង ញូវដេលី ។ ក្នុងជំនួបកំពូលមួយឈ្មោះថា Copenhagen Democracy ក្នុងសប្ដាហ៍នេះ តាមប្រព័ន្ធវីដេអូលោក ម៉ៃ ប៉ុមប៉េអូ និយាយដូច្នេះថា៖«កងទ័ពរំដោះប្រជាជនចិន បានបង្កភាពតានតឹងផ្នែកព្រំដែន។ យើងឃើញវាថ្ងៃនេះក្នុងប្រទេសឥណ្ឌា ហើយយើងឃើញចិនកំពុងធ្វើយោធូបនីយកម្មក្នុងសមុទ្រចិនខាងត្បូង ហើយទាមទារយកដែនអធិបតេយ្យភាពបន្ថែមដោយខុសច្បាប់នៅទីនោះ» ។
សូមជម្រាបថា ឥណ្ឌា និងចិន នៅថ្ងៃទី២០ ខែមិថុនាម្សិលមិញនេះ បានផ្ដោះផ្ដងសម្តីឌឺដងគ្នារឿងបំពានព្រំដែន ដែលកាលពីដើមសប្ដាហ៍នេះ បានក្លាយជាទីតាំងប៉ះទង្គិចគ្នាដែលមានករណីស្លាប់ច្រើនបំផុតមួយក្នុងពេលកន្លះសតវត្សរ៍ចុងក្រោយរវាងយក្សអាវុធនុយក្លេអ៊ែរអាស៊ីទាំងពីរ ។ ភាគីខាងឥណ្ឌា រាយការណ៍ទាហានស្លាប់២០នាក់ និងរបួស៧០នាក់ តែខាងចិនវិញសម្រេចមិនបញ្ចេញរបាយការណ៍ ៕ដោយ៖ស តារា
