សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ បុរសម្នាក់ជិះម៉ូតូក្នុងល្បឿនលឿនបានបុកជាមួយរថយន្តហុីយ៉ាន់ដាយចំពីមុខពេញទំហឹងបណ្តាលឲ្យបោកក្បាលស្លាប់ភ្លាមមួយរំពេចកាលពីវេលាម៉ោង៩នឹង១០នាទីយប់ថ្ងៃទី២៨ខែមិថុនាឆ្នាំ២០២០តាមបណ្តោយផ្លូវជាតិលេខ៣ស្ថិតក្នុងសង្កាត់ចោមចៅ៣ ខណ្ឌពោធិ៍សែនជ័យ។
បុរសដែលស្លាប់គេមិនទាន់ស្គាល់អត្តសញ្ញាណនៅឡើយទេ មានវ័យប្រមាណជាង៣០ឆ្នាំជិះម៉ូតូម៉ាកHONDA Click ពណ៌ស ពាក់ស្លាកលេខភ្នំពេញ1IC-9672 និងពាក់អាវពណ៌ក្រហម ស្លៀកខោជើងខ្លី។ចំណែករថយន្តហុីយ៉ាន់ដាយពាក់ស្លាកលេខភ្នំពេញ3C-8872 ។
ប្រភពព័ត៌មានពីកន្លែងកើតហេតុបានឲ្យដឹងថា នៅមុនពេលកើតហេតុគេឃើញបុរសខាងលើជិះម៉ូតូក្នុងល្បឿនយ៉ាងលឿន ខណៈមកដល់ចំណុចកើតហេតុបានបុកជាមួយរថយន្តហុីយ៉ាន់ដាយចំពីមុខពេញទំហឹងបណ្តាលឲ្យបោកក្បាលស្លាប់ភ្លាមៗមួយរំពេច ចំណែកម៉ូតូរងការខូចខាតផ្នែកខាងមុខយ៉ាងដំណំ។រីឯម្ចាស់រថយន្តឃើញសភាពបែបនេះបានរត់គេចខ្លួនបាត់។
ក្រោយកើតហេតុសមត្ថកិច្ចមូលដ្ឋានបានចុះទៅដល់កន្លែងកើតហេតុនិងបានទំនាក់ទំនងជំនាញឲ្យមកធ្វើការវាស់វែងយកវត្ថុតាងទាំង២គ្រឿងទៅរក្សាទុកនៅការិយាល័យចរាចរណ៍ជើងគោករាជធានីភ្នំពេញ។
ចំណែកសាកសពសមត្ថកិច្ចកំពុងស្រាវជ្រាវរកក្រុមគ្រួសារឲ្យមកទទួលយកទៅធ្វើបុណ្យ៕
ដោយ៖សុខាសែនជ័យ
