សារព័ត៌មាន នគរវត្ត តែងតែនាំមុខគេជានិច្ច
អន្តរជាតិ៖ ប្រជាពលរដ្ឋរុស្ស៊ីជិត៧៨ភាគរយ គាំទ្រវិសោធនកម្មរដ្ឋធម្មនុញ ដោយបើកផ្លូវឲ្យលោកប្រធានាធិបតីរុស្ស៊ី វ្ល៉ាឌីមៀ ពូទីនកាន់អំណាចបាន២អាណត្តិបន្ថែមទៀត ពោលគឺរហូតដល់ឆ្នាំ២០៣៦ ។ បន្ទាប់ពីលទ្ធផលផ្លូវការនៃការបោះឆ្នោតប្រជាមតិក្នុងការធ្វើវិសោធនកម្មរដ្ឋធម្មនុញរុស្ស៊ី ។
ការកែប្រែរដ្ឋធម្មនុញ្ញពេលនេះ នឹងបើកផ្លូវឲ្យលោក វ្ល៉ាឌីមៀ ពូទីន ចូលរួមក្នុងការបោះឆ្នោតឆ្នាំ២០២៤ ដែលជាអាណត្តិចុងក្រោយរបស់លោក។ ក្រោមរដ្ឋធម្មនុញ្ញរុស្ស៊ី អាណត្តិប្រធានាធិបតី មានរយៈពេល៦ឆ្នាំ និងមិនអាចកាន់តំណែងលើសពីពីរអាណត្តិជាប់គ្នាឡើយ ប៉ុន្តែអាចកាន់តំណែងនេះច្រើនដង ។ នេះក៏ព្រោះតែរដ្ឋធម្មនុញ្ញថ្មី នឹងមិនរាប់បញ្ចូលអាណត្តិប្រធានាធិបតីកន្លងមករបស់លោក ពូទីន ឡើយ។ប៉ុន្តែចូលរួមការបោះឆ្នោតឬអត់ លោក ពូទីន មិនទាន់សម្រេចចិត្តឡើយ។
យោងតាមការផ្សាយរបស់ទីភ្នាក់ងារព័ត៌មាន Reuters និយាយថាគណៈកម្មការបោះឆ្នោតរុស្ស៊ី បានប្រកាសថា ក្រោយការរាប់សន្លឹកឆ្នោតទាំងអស់មក ប្រជាពលរដ្ឋចំនួន៧៧,៩២ភាគរយគាំទ្រវិសោធនកម្មរដ្ឋធម្មនុញ។ ប្រជាមតិនេះមានការចូលរួមពីពលរដ្ឋចំនួន៦៥ភាគរយក្នុងចំណោមពលរដ្ឋដែលមានឈ្មោះក្នុងបញ្ជី ។ វត្តមានអ្នកបោះឆ្នោតលើស៥០ភាគរយជាចំនួនទាបបំផុតដើម្បីឲ្យលទ្ធផលបានការ។
ការពិតទៅ វិសោធនកម្មនេះ ពុំមែនពាក់ព័ន្ធតែនឹងរឿងអាណត្តិប្រធានាធិបតីឡើយ។ ក្នុងចំណោមចំណុចជាច្រើនដែលត្រូវបានដាក់ចូលក្នុងវិសោធនកម្មនោះ គេក៏ឃើញមានការកំណត់អាពាហ៍ពិពាហ៍គឺធ្វើរវាងមនុស្សប្រុសនិងស្រីដែលចំណុចនេះស្មើនឹងការហាមឃាត់ការរៀបការអ្នកស្រលាញភេទដូចគ្នាការកំណត់ប្រាក់ឈ្នួលអប្បរមាដែលខ្ពស់ជាងបន្ទាត់នៃភាពក្រីក្រ និងការបង្កើនប្រាក់សម្រាប់អ្នកចូលនិវត្តជាដើម។
លោកស្រី Ella Pamfilova ប្រធានគណកម្មការបោះឆ្នោតរុស្ស៊ី បានអះអាងថា ការបោះឆ្នោតមានតម្លាភាព ហើយមន្ត្រីបោះឆ្នោតបានធ្វើគ្រប់យ៉ាងដើម្បីធានាត្រឹមត្រូវនៃបោះឆ្នោតប្រជាមតិនេះ។ យ៉ាងណាក្តី លោកAlexi Navalny ដែលជាមេដឹកនាំបក្សប្រឆាំងបានលើកឡើងថាការបោះឆ្នោតប្រជាមតិនេះមិនស្របច្បាប់ និងរៀបចំឡើងដើម្បីឲ្យលោក ពូទីន ក្លាយជាប្រធានាធិបតីមួយជីវិត។ លោកប្រាប់អ្នកគាំទ្ររបស់លោកថា៖« យើង នឹងមិនទទួលយកលទ្ធផលនេះឡើយ»។
សូមជម្រាបថា ក្នុងទិដ្ឋភាពច្បាប់ គេពុំចាំបាច់ធ្វើប្រជាមតិដើម្បីអនុម័តវិសោធនកម្មឡើយ។ វិសោធនកម្មរដ្ឋធម្មនុញ្ញនេះត្រូវបានអនុម័តដោយសភាជាតិ និងតំបន់ ហើយចូលជាធរមានតាំងតែពីខែមុន។ ប៉ុន្តែការធ្វើប្រជាមតិនេះ ជាការធ្វើតេស្តប្រជាប្រិយភាពលោក ពូទីន និងដើម្បីទទួលបានភាពស្របច្បាប់ពីប្រជាជនចំពោះសេចក្តីសម្រេចចិត្តទាំងឡាយរបស់លោក ពូទីន ។ នេះជាការលើកឡើងរបស់លោកGreg B. Yudin សង្គមវិទូនិងអ្នកទ្រឹស្តីនយោបាយ នៅសាលាវិទ្យាសាស្ត្រសង្គម និងសេដ្ឋកិច្ចក្រុងម៉ូស្គូ។
គួរបញ្ជាក់ថា លោកប្រធានាធិបតីរុស្ស៊ី វ្ល៉ាឌីមៀ ពូទីន ឡើងដឹកនាំរុស្ស៊ីតាំងតែពីឆ្នាំ១៩៩៨ ដោយពេលខ្លះជានាយករដ្ឋមន្ត្រី ហើយចុងក្រោយជាប្រធានាធិបតីរហូតមក។ លោកក៏ត្រូវបានចាត់ទុកជាថ្នាក់ដឹកនាំដែលកាន់តំណែងយូរជាងគេបំផុត តាំងតែជំនាន់លោក ស្តាលីន ផងដែរ៕ដោយ៖សតារា
