សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង៖ ស្ត្រីចំណាស់មានសតិមិនគ្រប់ម្នាក់បានរអិលជើងធ្លាក់ចូលប្រឡាយព្រែកជីកក្បែរផ្ទះស្លាប់យ៉ាងអាណោចអាធ័ម បង្កការភ្ញាក់ផ្អើលដល់អ្នកភូមិប្រញាប់ប្រញាល់ជួយស្រង់ដាក់លើគោកដើម្បីធ្វើចលនាដៃជើងតែជាអកុសលយឺតពេលទៅហើយ។
ហេតុការណ៍នេះបានកើតឡើងកាលពីវេលាម៉ោង៦និង១០នាទីព្រឹកថ្ងៃទី៣ ខែកក្កដា ឆ្នាំ២០២០ ស្ថិតនៅភូមិថ្នល់ក្រួស ឃុំមុខដា ស្រុករមាសហែក។
បើតាមសមត្ថកិច្ចនគរបាលស្រុកបានឱ្យដឹងថា ស្ត្រីខាងលើមានឈ្មោះខៀវ ញ៉ អាយុ៦៩ឆ្នាំ មុខរបរកសិករ រស់ក្នុងភូមិឃុំកើតហេតុខាងលើ។
បើតាមក្រុមគ្រួសារបានប្រាប់សមត្ថកិច្ចថាម្ដាយរបស់ខ្លួនមានសតិមិនគ្រប់ទេដោយបានយកទៅព្យាបាលនិងផឹកថ្នាំសង្កូវដែរប៉ុន្តែនៅមិនធូរស្រាលសោះទើបចេះតែទុករហូតដល់សព្វថ្ងៃ។
មុនកើតហេតុម្ដាយគាត់បានដេីរទៅប្រឡាយព្រែកជីកក្បែរផ្ទះតែម្នាក់ៗមិនបានចាប់អារម្មណ៍ឡើយ រហូតដល់វេលាម៉ោង៦និង១០នាទីព្រឹកស្រាប់តែឃើញគាត់ធ្លាក់នៅក្នុងប្រឡាយទឹកធ្វើឱ្យមានការភ្ញាក់ផ្អើលដល់អ្នកភូមិនិងកូនៗនាំគ្នាប្រញាប់ប្រញាល់ជួយស្រង់ដាក់លើគោកធ្វើចលនាដៃជើង តែអកុសលយឺតពេលទៅហើយ។
ក្រោយមកសមត្ថកិច្ចជំនាញនៃអធិការដ្ឋាននគរបាលស្រុក សមត្ថកិច្ចប៉ុស្តិ៍រដ្ឋបាល និងគ្រូពេទ្យ បានចុះមកពិនិត្យស្លាកស្នាមសាកសព(កោសល្យវិច័យ)ឃើញថាមិនមានពាក់ព័ន្ធនឹងរឿងឃាតកម្មឡើយគឺពិតជាលង់ទឹកស្លាប់ប្រាកដមែន។
សមត្ថកិច្ចនគរបាលស្រុកបានប្រគល់សពឱ្យក្រុមគ្រួសារយកទៅធ្វើបុណ្យតាមប្រពៃណីទាំងក្ដុកក្ដួលបំផុត៕ យឹម សុថាន
