សារព័ត៌មាន នគរវត្ត តែងតែនាំមុខគេជានិច្ច
ខេត្តក្រចេះ ៖ កូនប្រសាឈាមក្តៅម្នាក់បានកែច្នៃគ្រាប់បែកបោកចូលផ្ទះឪពុកម្តាយក្មេកប៉ុនប៉ងសម្លាប់និងដុតកម្ទេចផ្ទះចោលដោយសារទំនាស់មួយ តែដោយគុណបុណ្យព្រះមិនជួយបានភ្លាត់ស្នៀតផ្ទុះរលាកកូនប្រុសនិងរលាកខ្លួនឯងទៅវិញ។ទីបំផុតកូនប្រសាចិត្តអប្រិយរូបនេះត្រូវបានកម្លាំងនគរបាលឃាត់ខ្លួនទាល់តែបាន។
ហេតុការណ៍នេះកើតឡើងនៅ វេលាម៉ោង១៣រសៀលថ្ងៃទី០៦ ខែកក្កដា ឆ្នាំ២០២០ នៅក្នុងភូមិចង្ហប ឃុំក្បាលដំរី ស្រុកសំបូរ ខេត្តក្រចេះ ត្រង់ចំណុចដីស្រែចំការប្រវ៉ា មានចម្ងាយពីផ្លូវជាតិលេខ៧ ប្រហែល១០គីឡូម៉ែត្រ។
ជនសង្ស័យឈ្មោះ ធា ធី ភេទប្រុស អាអាយុ៤២ឆ្នាំមុខរបរកសិករមានទីលំនៅភូមិកើតហេតុខាងលើ បានយកគ្រាប់បែកកែច្នៃចំនួន០៣គ្រាប់ និងសាំងចំនួន០៣ដប ក្នុងគោលបំណងយកទៅគប់ចូលផ្ទះឪពុកនិងម្តាយក្មេករបស់ខ្លួន ព្រោះខឹងនិងមានទំនាស់គ្នានាពេលកន្លងមក។ លុះពេលបានដុតគ្រាប់បែកច្នៃ១គ្រាប់ បំណងគប់ចូលផ្ទះឪពុកម្តាយក្មេកខុសបច្ចេកទេស ក៏ផ្ទុះត្រូវរបួសដៃស្តាំខ្លួនឯង និងត្រូវឆេះរោលលើកូនប្រុសខ្លួនឯងម្នាក់ទៀត របួសធ្ងន់។
បន្ទាប់ពីទទូលព័ត៌មាននេះភ្លាម កម្លាំងនគរបាលមូលដ្ឋានបានចុះទៅដល់កន្លែងកើតហេតុ ធ្វើការស្រាវជ្រាវនិងឈានទៅឃាត់ខ្លួនជនសង្ស័យឈ្មោះ ធា ធី បាននៅបាននៅវេលាម៉ោង៣រសៀល ថ្ងៃខែឆ្នាំដដែល គ្រាដែលរត់គេចចូលក្នុងចម្ការ។
បន្ទាប់មក ជនសង្ស័យ និងកូនត្រូវបញ្ជូនទៅសម្រាកព្យាបាលបន្តនៅមន្ទីរពទ្យបង្អែកខេត្តក្រចេះនិងកំពុងចាត់ការតាមនីតិវិធី៕
ដោយ៖ប្រាថ្នា
