រថយន្តពីរគ្រឿងបុកគ្នាពេញទំហឹងបណ្តាលឲ្យមនុស្សប្រុសស្រី៧នាក់របួសធ្ងន់ស្រាល

ភ្នំពេញ៖ យ៉ាងហោចណាស់ក៏មានមនុស្សប្រុសស្រីចំនួន៧នាក់ដែរបានរងរបួសធ្ងន់និងស្រាលក្នុងហេតុការណ៍គ្រោះថ្នាក់ចរាចរណ៍មួយរវាងរថយន្តសាំយ៉ុងនឹងរថយន្តម៉ាស្តាបុកគ្នាយ៉ាងពេញទំហឹងកាលពីវេលាម៉ោង ១១ យប់ថ្ងៃទី៩ ខែកក្កដា ឆ្នាំ ២០២០ នៅចំណុចមុខច្រកចូលវត្តពោធិ៍វ័ន តាមបណ្តោយមហាវិថីឈ្នះ=ឈ្នះ ស្ថិតក្នុងភូមិត្រពាំងធ្នង់ សង្កាត់សំរោងក្រោម ខណ្ឌពោធិ៍សែនជ័យ រាជធានីភ្នំពេញ។

តាមប្រភពព័ត៌មានពីកន្លែងកើតហេតុបានឲ្យដឹងថា មុនកើតហេតុគេឃើញបុរសម្នាក់បើករថយន្តស៊េរីទំនើបម៉ាកម៉ាស្តាមួយគ្រឿងពណ៌សពាក់ស្លាកលេខភ្នំពេញ2BG-3906តាមបណ្ដោយមហាវិថីឈ្នះ=ឈ្នះក្នុងទិសដៅពីត្បូងទៅជើង លុះមកដល់ចំណុចកើតហេតុខាងលើរថយន្តនេះបានបត់ឆ្វេងដៃឆ្លងផ្លូវចូលទៅវត្តពោធិ៍វ័នដោយខ្វះការប្រុងប្រយ័ត្ន ក៏ត្រូវរថយន្តសាំយ៉ុងមួយគ្រឿងពណ៌ស ពាក់ស្លាកលេខភ្នំពេញ2AF-7492បើកបរដោយបុរសម្នាក់រួមដំណើរជាមួយនឹងមនុស្សប្រុសស្រីចំនួន៦នាក់ទៀតធ្វើដំណើរបញ្ច្រាសទិសដៅគ្នាពីជើងទៅត្បូងចាប់ហ្វ្រ័ងមិនទាន់ក៏ជ្រុលទៅបុករថយន្តម៉ាស្តាចំពីខាងមុខចំហៀងខាងស្ដាំយ៉ាងពេញទំហឹងបណ្ដាលឲ្យខាងរថយន្តសាំយ៉ុងមានគ្នា៧ នាក់រងរបួសធ្ងន់និងស្រាល ក្នុងនោះមានអ្នករងគ្រោះ៣នាក់រងរបួសធ្ងន់។បន្ទាប់មកមានរថយន្តសង្គ្រោះបន្ទាន់បានមកដឹកជនរងគ្រោះទាំងអស់យកទៅសង្គ្រោះនៅឯមន្ទីរពេទ្យភ្លាមៗ។

ចំណែករថយន្តទាំងពីរគ្រឿងរងការខូចខាតយ៉ាងដំណំដូចគ្នា។ប៉ុន្តែខាងភាគីរថយន្តម៉ាស្តារមិនមានអ្នករងរបួសនោះទេបានគេចខ្លួនចេញពីកន្លែងកើតហេតុបាត់ទៅ។

ក្រោយកើតហេតុសមត្ថកិច្ចមូលដ្ឋានបានចុះមកដល់ហើយបានទំនាក់ទំនងទៅសមត្ថកិច្ចជំនាញចុះមកធ្វើការវាស់វែងយករថយន្តទាំងពីរគ្រឿងទៅរក្សាទុកនៅការិយាល័យចរាចរណ៍ផ្លូវគោកនៃស្នងការដ្ឋានរាជធានីភ្នំពេញរង់ចាំធ្វើការដោះស្រាយគ្នានៅពេលក្រោយ៕ដោយ៖​ សុខាសែនជ័យ​