តន់ ចន្ទសីម៉ា មានឱកាសចាប់ដៃគូច្រៀងរួមគ្នាជាមួយតារាចម្រៀងថៃ ខាំផែង

   ភ្នំពេញ៖ សាងភាពភ្ញាក់ផ្អើលជាថ្មីបន្តបន្ទាប់ តារាចម្រៀងស្រីល្បីឈ្មោះកញ្ញា តន់ ចន្ទសីម៉ា ស្រាប់តែបង្ហាញស្នាដៃច្រៀងបទចម្រៀងថ្មីរួមគ្នាជាមួយតារាចម្រៀងថៃលោក ខាំផែង។

នេះត្រូវបានគេចាត់ទុកថាជាជំហានថ្មីសម្រាប់តារាស្រីរូបនេះបន្ទាប់ពីនាងទទួលបានឱកាសច្រៀងបទចម្រៀងថ្មីរបស់ផលិតកម្មរួមទាំងការច្រៀងរួមគ្នាជាមួយតារាចម្រៀងក្នុងស្រុកល្បីឈ្មោះរួចមក។

​បទចម្រៀងថ្មីជាច្រើនបទរបស់ តន់ ចន្ទសីម៉ា សុទ្ធតែផ្ទុះចេញការគាំទ្រខ្លាំងពីទស្សនិកជនពិសេសក្រុមយុវវ័យ។ ម្ចាស់បទ”ឡានសារ៉ែន” រូបនេះក៏ទើបនឹងបញ្ចេញបទមួយចំនួនដែលជាការច្រៀងរួមគ្នាជាមួយតារាចម្រៀងលំដាប់ជួរមុខ ខេម ដូចជាបទ”ការស្រលាញ់ដែលខ្វះជាតិស្ករ”និងបទ”ចង់សុំWifi”ជាដើម។ មានការភ្ញាក់ផ្អើលមួយជាបន្តក្រោយពី កញ្ញា តន់ ចន្ទសីម៉ា លេចមុខក្នុងបទ”ដណ្តឹងបងទៅ” ដែលជាបទចម្រៀងពេញនិយមមួយរបស់ផលិតកម្ម Galaxy Navatra។ ការផ្តល់ឱកាសធំៗជាច្រើនត្រូវបានគេដឹងថាផលិតកម្មបាននិងកំពុងរុញច្រានតារាចម្រៀងរូបនេះឲ្យឡើងកាន់តែខ្ពស់និងអាចក្លាយជាតារាចម្រៀងលំដាប់ជួរមុខវ័យក្មេងនៅកម្ពុជាផងដែរ។ បទចម្រៀងថ្មីជាមួយតារាចម្រៀងថៃខាងលើទទួលបានការគាំទ្រច្រើនពីទស្សនិកជនខណៈដែលបទចម្រៀងនេះច្រៀង២ភាសារួមគ្នាតែម្តង រួមទាំងការច្នៃបទភ្លេងដ៏គួរឲ្យទាក់ទាញ។ អ្នកគាំទ្របានហៅការច្រៀងរួមគ្នាជាមួយតារាចម្រៀងថៃល្បីឈ្មោះរូបនេះថាជារបត់ថ្មីដ៏គួរឲ្យទាក់ទាញ និងជាចំណាប់អារម្មណ៍សម្រាប់អ្នកគាំទ្រក្រៅស្រុកងាកមកចាប់អារម្មណ៍នឹងវិស័យសិល្បៈពិសេសផ្នែកបទចម្រៀងរបស់កម្ពុជា ដែលប្តូរពីការចម្លងបទចម្រៀងបរទេសមកជាការផលិតបទចម្រៀងថ្មីប្រកបដោយគុណភាព៕ ដោយ៖ វឌ្ឍនា

​