សារព័ត៌មាន នគរវត្ត តែងតែនាំមុខគេជានិច្ច
កូរ៉េខាងជើង៖ សារព័ត៌មានរ៉យទ័រនៅថ្ងៃទី២០ខែកក្កដា បានផ្សាយថា មេដឹកនាំកូរ៉េខាងជើង គីម ជុងអ៊ុន បានបញ្ជាឲ្យដកតំណែងមន្ត្រីមួយចំនួនពាក់ព័ន្ធនឹងគម្រោងសាងសង់មន្ទីរពេទ្យនៅក្នុងប្រទេសនេះ។
នេះជាការសម្រេចដ៏កម្ររបស់ថ្នាក់ដឹកនាំកូរ៉េខាងជើង ហើយមូលហេតុដែលនាំឱ្យឈានដល់ការ ដកតំណែងនេះគឺដោយសារតែមន្ត្រីទាំងនោះអំពាវនាវដល់ពលរដ្ឋឱ្យជួយបរិច្ចាគធនធានដើម្បីសាងសង់មន្ទីរពេទ្យ។ សកម្មភាពទាំងនោះធ្វើឲ្យលោកគីម ជុងអ៊ុនមិនពេញចិត្តឡើយ។
កន្លងមក មេដឹកនាំគីម ជុងអ៊ុន បានស្នើឲ្យសាងសង់មន្ទីរពេទ្យ នៅទីក្រុងព្យុងយ៉ាង ដើម្បីថែទាំសុខភាពសាធារណៈ ។ ប៉ុន្តែក្នុងពេលលោកគីម ទៅត្រួតពិនិត្យ ការដ្ឋានសាងសង់ក៏បានសម្រេចឲ្យដកតំណែងមន្ត្រីគ្រប់គ្រងមួយចំនួន ដែលបែងចែកមូលនិធិមិនសមហេតុផលក្នុងការសាងសង់ ហើយអំពាវនាវឲ្យពលរដ្ឋចូលរួមទៀតផង។
តាមសារព័ត៌មាន កូរ៉េខាងជើង KCNA បានផ្សាយថា លោក គីម ជុងអ៊ុនបានថ្កោលទោសយ៉ាងខ្លាំងដល់មន្ត្រីគ្រប់គ្រងការដ្ឋាន ពិសេស ការអំពាវនាវឲ្យពលរដ្ឋបរិច្ចាគក្នុងការសាងសង់។
លោកគីម ចង់ឲ្យការសាងសង់មន្ទីរពេទ្យនេះគឺជាការចំណាយរបស់រដ្ឋទាំងអស់ ៕ដោយ៖ធី រីណា
