សារព័ត៌មាន នគរវត្ត តែងតែនាំមុខគេជានិច្ច
អន្តរជាតិ៖ អាជ្ញាធរអាមេរិក កាលពីថ្ងៃអង្គារ ទី២១ ខែកក្កដាម្សិលមិញនេះបានឃាត់ខ្លួនលោក Larry Householder ដែលជាប្រធានសភាតំណាងរាស្រ្តនៃរដ្ឋ Ohio របស់សហរដ្ឋអាមេរិក ពាក់ព័ន្ធសំណុំរឿងស៉ីសំណូកសូកប៉ាន់ ដែលមានទឹកប្រាក់ចំនួន៦០លានដុល្លារ។
បើតាមទីភ្នាក់ងារព័ត៌មានចិនស៊ីនហួរ បានចេញផ្សារនៅថ្ងៃពុធ ទី២២ខែកក្កដា ឆ្នាំ២០២០នេះថា យោងតាមពាក្យបណ្តឹងព្រហ្មទណ្ឌ បានបញ្ជាក់ថា លោក Householder និងមនុស្ស៤នាក់ទៀតដែលជាប់ពាក់ព័ន្ធ ដោយបានទទួលលុយសំណូករាប់លានដុល្លារពីក្រុមហ៊ុនមួយ ជាថ្នូរនឹងការជួយឲ្យអនុម័តកញ្ចប់ថវិកាមួយខ្ទង់ពាន់លានដុល្លារ ដើម្បីសង្គ្រោះរោងចក្រថាមពលនុយក្លេអ៊ែរ២កន្លែង របស់ក្រុមហ៊ុននោះ។ មិនតែប៉ុណ្ណោះ លោក David DeVillers រដ្ឋអាជ្ញាប្រចាំរដ្ឋ Ohio បានគូសបញ្ជាក់ថា មនុស្ស៤នាក់ផ្សេងទៀត ក៏ត្រូវបានចាប់ខ្លួនផងដែរ និងហៅករណីខាងលើនេះថា ជាកាស៉ីសំណូកដ៏ធំបំផុតមិនធ្លាប់មានឡើយ ក្នុងប្រវត្តិសាស្រ្តរបស់រដ្ឋ Ohio។
គួរបញ្ជាក់ថា ជុំវិញបញ្ហាខាងលើនេះ លោក Mike DeWine អភិបាលរដ្ឋOhio ដែលនៅគណបក្សសាធារណរដ្ឋដូចលោក Householder ដែរនោះបានអំពាវនាវ ឲ្យលោក Householder លាលែងពីតំណែងជាបន្ទាន់ ដោយបានអះអាងថា តំណាងរាស្រ្តរូបនេះមិនសមក្នុងការបន្តដឹកនាំសភារដ្ឋ Ohio តទៀតឡើយ នៅចំពោះមុខសភាពបែបនេះ។
បើយោងទៅតាមជីវប្រវត្តិសង្ខេបផ្លូវការ លោក Householder បានជាប់ឆ្នោតជាសមាជិកសភារដ្ឋ Ohio ជាលើកដំបូងកាលពីឆ្នាំ ១៩៩៦មកម្លេះ ៕ដោយ៖ស តារា
