សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ សមត្ថកិច្ចនគរបាលខណ្ឌដូនពេញបានឃាត់ខ្លួនជនសង្ស័យចំនួន២នាក់ពីបទប៉ុនប៉ងលួច នៅថ្ងៃទី២៥ ខែកក្កដា ឆ្នាំ២០២០ វេលា ម៉ោង១០និង៣០នាទីព្រឹក នៅចំណុចផ្លូវលេខ៦៣ ភូមិ៩ សង្កាត់បឹងរាំង ខណ្ឌដូនពេញ រាជធានីភ្នំពេញ។
សមត្ថកិច្ចបានឲ្យដឹងថា ជនសង្ស័យត្រូវឃាត់ខ្លួនមាន៖
ទី១-ឈ្មោះ សំ ពិសិដ្ឋ អាយុ ២៧ឆ្នាំ ជនជាតិខ្មែរ មុខរបរមិនពិតប្រាកដ ស្នាក់នៅផ្ទះជួលក្នុងសង្កាត់ទួលសង្កែ ខណ្ឌឫស្សីកែវ រាជធានីភ្នំពេញ។
ទី២-ឈ្មោះ ប៉ាត់ សុធារ៉ា ហៅ ព្រែក អាយុ ២២ឆ្នាំ ជនជាតិខ្មែរ មុខរបរមិនពិតប្រាកដ ស្នាក់នៅផ្ទះជួលម្តុំវិហារចាម ភូមិ២២ សង្កាត់ស្រះចក ខណ្ឌដូនពេញ រាជធានីភ្នំពេញ។
វត្ថុតាងចាប់យកមានម៉ូតូ១គ្រឿងម៉ាកហុងដា Zoomer X ពណ៌ ខ្មៅ ពាក់ស្លាកលេខ ភ្នំពេញ 1HN-9392 សោដែកអក្សរT លេខ8 សម្រាប់កាច់សោ.កម៉ូតូចំនួន១ និងដែកសំប៉ែតចុងស្រួចសម្រាប់កាច់សោ.កម៉ូតូចំនួន១។
បច្ចុប្បន្នជនសង្ស័យទាំង២នាក់ កំពុងឃាត់ខ្លួនបណ្តោះអាសន្ននៅអធិការដ្ឋាននគរបាលខណ្ឌដូនពេញ ដើម្បីកសាងសំណុំរឿងបញ្ជូនទៅសាលាដំបូងរាជធានីភ្នំពេញចាត់ការបន្តតាមនីតិវិធី៕
ដោយ៖ជ្រោយ ពេជ្រ
