សារព័ត៌មាន នគរវត្ត តែងតែនាំមុខគេជានិច្ច
ខេត្តមណ្ឌលគិរី៖ នៅរសៀលថ្ងៃទី ២៨ ខែកក្កដា ឆ្នាំ២០២០ លោក វេង សាខុន រដ្ឋមន្ត្រីកសិកម្មរុក្ខាប្រមាញ់ និងនេសាទ បានអញ្ជើញមកមើលចំការក្រូចវល្លិ៍ ទុរេន និងផ្លែប៊ឺ របស់បងស្រី ប្រាក់ សាវី ក្នុងក្រុងសែនមនោរម្យ ហើយម្ចាស់ចម្ការមាន (លេខទំនាក់ទំនង ០៩៧ ៧៩ ៧០ ១៤៥)ផងដែរក្នុងការលក់ផ្លែឈើធម្មជាតិនេះ។
ក្នុងដំណើរមើលផលដំណាំបណ្តើរ លោកស្រីម្ចាស់ចំការ បានរៀបរាប់អំពីផលដំណាំជូនលោករដ្ឋមន្រ្តីបណ្តើរ ថាបច្ចុប្បន្នដំណាំឈើហូបផ្លែខាងលើ ទទួលបានផលល្អ និងកំពុងពេញនិយមនៅលើទីផ្សារ ពិសេសផ្លែប៊ឺ សម្រាប់ភ្ញៀវអញ្ជើញមកពីភ្នំពេញ និងបញ្ជាទិញយកទៅភ្នំពេញ។ ជាមធ្យមបងស្រីអាចរកចំណូលបានពី ១០ ០០០-១៥ ០០០ដុល្លារក្នុង ១ឆ្នាំ លើផ្ទៃដី ៧ហត។ បងស្រីបញ្ជាក់ថាដោយសារចំណូលនេះហើយធ្វើឲ្យកូនពីរនាក់មួយចប់បរិញ្ញាបត្រច្បាប់ និងមួយទៀតសញ្ញាបត្រវេជ្ជបណ្ឌិត និងមួយទៀតកំពុងត្រៀមប្រលងសញ្ញាបត្រមធ្យមសិក្សាទុតិយភូមិឆ្នាំ២០២០នេះ។
ឃើញផល្លានុផលក្នុងចំការដុះលូតលាស់ ឲ្យផលបានល្អប្រសើរ លោករដ្ឋមន្ត្រីអត់សរសើរមិនបានចំពោះការខិតខំប្រឹងប្រែងមើលថែរទាំដំណាំបានទទួលផលយ៉ាងល្អ និងចំណូលខ្ពស់ សម្រាប់ទ្រទ្រង់ជីវភាពគ្រួសារ កូនៗបានរៀនសូត្រជ្រៅជ្រះ គ្រួសារជួបជុំ មានសុភមង្គល។ កត្តា វិជ្ជមានទាំងអស់នេះហើយគឺជាបំណងប្រាថ្នារបស់រាជរដ្ឋាភិបាលស្របពេលដែលសេដ្ឋកិច្ចជាតិកំពុងប្រឈមនឹងបញ្ហាដែលបណ្តាលមកពីជំងឺឆ្លងកូវីដ-១៩ និងវិស័យមួយចំនួនកំពុងអសកម្ម។ លោករដ្ឋមន្ត្រីបានលើកទឹកចិត្តឲ្យបងស្រីខិតខំប្រឹងប្រែងបន្ថែមទៀតទាំងទ្រឹស្តី និងការអនុវត្តជាក់ស្តែងធ្វើយ៉ាងណាធានាទាំងបរិមាណ និងគុណភាពសម្រាប់ផលិតផលផ្លែឈើក្នុងចំការរបស់បងស្រីដែលកំពុងមានសក្តានុពលទាំងក្នុងតំបន់ និងក្រៅតំបន់។ លោករដ្ឋមន្ត្រីបានជូន ១០០ដុល្លារ ហើយថាប្រាក់រង្វាន់លើកទឹកចិត្ត ក្នុងនាមថ្នាក់ដឹកនាំក្រសួងពេលឃើញបងស្រីខិតខំបង្កបង្កើនផលផង និងអប់រំ ទូន្មានព្រានប្រដៅ ណែនាំកូនៗបានរៀនសូត្រខ្ពង់ខ្ពស់ ដែលពួកគេគឺជាធនធានមនុស្សមានសមត្ថភាព ចេញពីគ្រួសារកសិករដាំដំណាំជារបរស្នូលដើម្បីសេដ្ឋកិច្ចគ្រួសារ៕ដោយ៖សិលា
