សារព័ត៌មាន នគរវត្ត តែងតែនាំមុខគេជានិច្ច
ខេត្តព្រៃវែង៖ មនុស្ស២នាក់ ទើបត្រឡប់មកពីប្រទេសម៉ាឡេស៉ី បានរត់ចេញពីមណ្ឌលធ្វើចត្តាឡីស័ក នៅខេត្តព្រៃវែង នាថ្ងៃទី០៣ ខែសីហា ឆ្នាំ២០២០នេះ។ មកដល់ពេលនេះ កម្លាំងសមត្ថកិច្ចនៃស្នងការដ្ឋាននគរបាលខេត្តព្រៃវែង ក្រោមការបញ្ជាផ្ទាល់ពីលោកឧត្តមសេនីយ៍ត្រី ព្រំ សន្ធរ ស្នងការនគរបាលខេត្ត បានស្រាវជ្រាវយ៉ាងយកចិត្តទុកដាក់ដោយបានរកឃើញ និងបានធ្វើការអប់រំណែនាំ និងក៏បាននាំខ្លួនមនុស្សទាំង២នាក់នេះ ត្រឡប់មកកន្លែងធ្វើចត្តាឡីស័កវិញ ។
បុរស់ទាំង០២នាក់នេះ ទី១៖ឈ្មោះ កំសត់ វិស័យ អាយុ២១ឆ្នាំ និងទី២៖ឈ្មោះ ចន កំសាន អាយុ៣២ឆ្នាំ។
សូមបញ្ជាក់ជូនថា ៖ មនុស្សទាំង០២នាក់ដែលបានរត់ចេញពីកន្លែងធ្វើចត្តាឡីស័កនេះ បានត្រឡប់មកពីប្រទេសម៉ាឡេស៉ី កាលពីថ្ងៃទី២៣ ខែកក្កដា ឆ្នាំ២០២០។ ពួកគេត្រូវបានមន្ដ្រីសុខាភិបាល យកសំណាកទៅពិនិត្យចំនួន៣លើកមកហើយ ពោលនៅថ្ងៃទី២៣, ២៦, ២៩កន្លងទៅ ហើយនៅថ្ងៃទី០៦ ខែសីហា នឹងត្រូវយកសំណាកទៅពិនិត្យបន្ដទៀត ប៉ុន្ដែស្រាប់តែពួកគេរត់ចេញនៅថ្ងៃនេះតែម្ដង។
កន្លងទៅក៏ធ្លាប់មានករណីអ្នករត់ចេញពីមណ្ឌលធ្វើចត្ដាឡីស័កផងដែរ ប៉ុន្ដែត្រូវសមត្ថកិច្ចរកឃើញ នឹងនាំមកបន្ដតាមដានសុខភាពវិញ រហូតដល់ថ្ងៃកំណត់ទើបអនុញ្ញាតឲ្យត្រឡប់ទៅផ្ទះវិញ។
លោកស្រី ឱ វណ្ណឌីន រដ្ឋលេខាធិការ និងជាអ្នកនាំពាក្យក្រសួងសុខាភិបាល ក៏បានថ្លែងនៅយប់ថ្ងៃទី៣ ខែសីហា ឆ្នាំ២០២០ថា៖ អ្នកធ្វេីចត្តាឡីស័ករត់ ០២នាក់នៅព្រៃវែងនោះ រកឃេីញហេីយបាននាំមកកន្លែងចត្តាឡីស័កវិញ។
តាមពិតទាំងអាជ្ញាធរ សមត្ថកិច្ច មន្ត្រីសុខាភិបាល បានខិតខំ ឱ្យប្រជាពលរដ្ឋដែលទើបមកពីបរទេស ធ្វើចត្តាឡីស័ក ដើម្បីការពារនូវជំងឺវីរុសកូវីដ-១៩ ប៉ុន្តែប្រជាពលរដ្ឋខ្លះមិនបាន អនុវត្តឱ្យបានត្រឹមត្រូវយកការរត់ចេញជាជម្រើសមិនល្អទៅវិញ៕
ដោយ៖សិលា
