សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ នៅព្រឹកថ្ងៃពុធ ០១រោច ខែស្រាពណ៍ ឆ្នាំជូត ទោស័កព.ស២៥៦៤ ត្រូវនឹងថ្ងៃទី០៥ ខែសីហា ឆ្នាំ២០២០ វេលាម៉ោង០៨និង៣០នាទីលោក ម៉ុក ច័ន្ទករុណា អភិបាលរងខណ្ឌដូនពេញបានដឹកនាំក្រុមការងារត្រួតពិនិត្យសំណង់ក្នុងមូលដ្ឋានខណ្ឌ ជាក់ស្តែងទីតាំបសំណង់មួយកន្លែងដែលគ្មានលិខិតអនុញ្ញាត ស្ថិតនៅលើអគារអតីតសាលាបក្សកងទ័ព ក្បាលដីលេខ១៩៨ ច្រកផ្លូវលេខ៦៣ ភូមិ១២ សង្កាត់ផ្សារថ្មីទី៣ ខណ្ឌដូនពេញ រាជធានីភ្នំពេញ ត្រូវបានផ្អាកជាបណ្ដោះអាសន្នសិន ។
លោក ម៉ុក ច័ន្ទករុណា អភិបាលរងខណ្ឌ បានបញ្ជាក់ថា ដោយយោងសេចក្តីជូនដំណឹងរបស់រដ្ឋបាលខណ្ឌដូនពេញ ចំនួន០៣លើក និងប្រសាសន៍ដឹកនាំរបស់ លោក សុខ ពេញវុធ អភិបាល នៃគណៈអភិបាលខណ្ឌដូនពេញ ចុះថ្ងៃទី០៤ ខែសីហា ឆ្នាំ២០២០ ទើបលោក ដឹកនាំក្រុមការងារត្រួតពិនិត្យសំណង់ខណ្ឌចុះពិនិត្យជាក់ស្តែងតែម្តង ។ បន្ទាប់ពីចុះដល់ទីតាំង ពិនិត្យឃេីញថា មានការសាងសង់ហ្វ៊ែមដែកនៅលើអគារអតីតសាលាបក្សកងទ័ពដែលចាស់ទ្រុឌទ្រោមបណ្តាលមកពីគ្រោះអគ្គីភ័យ កើតឡើងកាលពីយប់ថ្ងៃទី០៦ ខែមីនា ឆ្នាំ២០២០កន្លងទៅដែលអគារនេះមិនអាចប្រើប្រាស់បានទៀតទេ ដើម្បីជៀសវាងគ្រោះថ្នាក់ជាយថាហេតុ ។
ក្រោយប្រតិបត្តិការរួច ក្រុមការងារបានណែនាំដល់ម្ចាស់ផ្ទះដូចខាងក្រោម៖
១ – ត្រូវផ្អាកការសាងសង់ជាបណ្តោះអាសន្ន ។
២ – ត្រូវបំពេញបែបបទសុំច្បាប់អនុញ្ញាតសាងសង់ឲ្យបានត្រឹមត្រូវ ។
៣ – ដើម្បីបង្ការហានិភ័យកើតឡើងដែលអាចបង្កគ្រោះថ្នាក់ដល់អាយុជីវិតលោក លោកស្រី ដែលស្ថិតនៅក្នុងអគារសំណង់មន្ទីរបក្សកងទ័ព ត្រូវពិចារណាអំពីការចាកចេញពីអគារឆេះទៅរកទីតាំងស្នាក់នៅជាបណ្តោះអាសន្ន ។ ក្នុងករណីមានឧបទេវហេតុណាមួយកើតឡើងជាយថាហេតុពីអគារដែលចាស់ទ្រុឌទ្រោមនេះ សាមុីខ្លួនត្រូវទទួលខុសត្រូវដោយខ្លួនឯង ។ បន្ទាប់ពីបានអានកំណត់ហេតុជូនម្ចាស់ផ្ទះស្តាប់ចប់សព្វគ្រប់ ហើយម្ចាស់ផ្ទះបានឯកភាពតាមការណែនាំរបស់ក្រុមការងារទាំងស្រុង ។ ដោយកំណត់ហេតុបានបញ្ចប់នៅវេលាម៉ោង១០និង០០នាទីព្រឹក នាថ្ងៃខែឆ្នាំដដែល ៕ដោយ៖ស តារា
