សារព័ត៌មាន នគរវត្ត តែងតែនាំមុខគេជានិច្ច
អន្តរជាតិ៖ បើតាមអះអាងរបស់រដ្ឋមន្ត្រីសុខាភិបាលវៀតណាម បានរាយការណ៍ពីករណីឆ្លង COVID-19 ថ្មីចំនួន ៤៥ករណីបន្ថែមទៀតដែលភាគច្រើនជាករណីពាក់ព័ន្ធការឆ្លងនៅក្នុងទីក្រុងដាណាង ដោយករណីឆ្លងនេះ បានរាតត្បាតទៅខេត្ត-ក្រុងយ៉ាងតិច ចំនួន១០ ។
រដ្ឋមន្ត្រីសុខាភិបាលវៀតណាម បានអះអាងនៅថ្ងៃទី៥ ខែសីហា ម្សិលមិញថា COVID-19 បានរាតត្បាតទៅខេត្ត Bac Giang ក្បែរទីក្រុងហូជីមិញនិងខេត្តភាគខាងជើង ជាប់ព្រំដែនចិន។ យ៉ាងហោចណាស់ ខេត្តក្រុងរបស់វៀតណាមចំនួន១០ មានករណីឆ្លង COVID-19 ទាក់ទងនឹងទីក្រុងដាណាង។
សូមជម្រាបថា ក្នុងចំណោមករណីឆ្លងថ្មីទាំង៤៥ ដែលប្រកាសនៅថ្ងៃទីល្ងាចថ្ងៃទី៥ និងព្រឹកថ្ងៃទី៦ មាន៤៤ករណីទាក់ទងនឹងករណីឆ្លងនៅទីក្រុងដាណាង និង១ករណីជាករណីឆ្លងមកពីបរទេស។ ករណីឆ្លងថ្មីនេះ ត្រូវបានគេរកឃើញនៅក្នុង ទីក្រុងហូជីមិញ ខេត្ត Quang Nam ទីក្រុងដាណាង និងទីក្រុង ខេត្តផ្សេងទៀត។ រហូតមកទល់ពេលនេះ អាជ្ញាធរ មិនទាន់អាចវាយតម្លៃបានទេ ថាតើប្រភពឆ្លងCOVID-19 ដំបូងមកពីណា ប៉ុន្តែគេដឹងត្រឹមតែថា ករណីឆ្លងដំបូង គឺមានទាក់ទងនឹងមន្ទីរពេទ្យបីកន្លែងក្នុងទីក្រុងដាណាង។
គួរបញ្ជាក់ថា បើទោះបីជា ករណីឆ្លង COVID-19 នៅតែបន្តកើនឡើងក៏ដោយ ប៉ុន្តែគណៈកម្មាធិការគ្រប់គ្រងCOVID-19 របស់រដ្ឋាភិបាលវៀតណាម បានអះអាងថា ករណីផ្ទុះ COVID-19 នៅក្នុងទីក្រុងដាណាងស្ថិតនៅក្រោមការគ្រប់គ្រង។ អាជ្ញាធរវៀតណាម បានប្តេជ្ញាថានឹងមិនឲ្យរលកឆ្លងលើកទីពីរ កើតឡើងក្នុងប្រទេសជាដាច់ខាត។ នេះបើតាមសេចក្តីថ្លែងការណ៍មួយរបស់គណៈកម្មាធិការគ្រប់គ្រងCOVID-19 នៅថ្ងៃទី៤ខែសីហា។
បច្ចុប្បន្ន បើគិតមកត្រឹមព្រឹកថ្ងៃទី៦ ខែសីហានេះ ប្រទេសវៀតណាម មានករណីឆ្លង COVID-19 សរុបចំនួន ៧១៧ករណី អ្នកស្លាប់មានចំនួន ៨នាក់។ ចំណែកអ្នកជាសះស្បើយមានចំនួន ៣៨១នាក់៕ដោយ៖ស តារា
