សារព័ត៌មាន នគរវត្ត តែងតែនាំមុខគេជានិច្ច
អន្តរជាតិ៖ គណៈគ្រប់គ្រងបណ្តាញសង្គម Facebook កាលពីថ្ងៃទី៥ខែសីហា បានប្រកាសថា បានលុបអត្ថបទដែលបានបង្ហោះលើបណ្តាញសង្គមផ្ទាល់ខ្លួនរបស់ប្រធានាធិបតីដូណាល់ ត្រាំ ដោយសារតែអត្ថបទនោះនិយាយខុសពីការណ៍ពិតស្តីពីកូវីដ-១៩។
ការចុះផ្សាយរបស់លោកត្រាំ គឺឃ្លីបវីដេអូឆ្លើយតបបទសម្ភាសន៍របស់បណ្តាញព័ត៌មានFox News កាលពីថ្ងៃទី៥ខែសីហា ។ អ្នកនាំពាក្យក្រុមហ៊ុន Facebook លោក Andy Stone បានប្រកាសឲ្យដឹងថា«វីដេអូដែលលោកត្រាំបង្ហោះខុសតួលេខស្តីពីអ្នកឆ្លងកូវីដ-១៩ ទាំងនោះគឺផ្ទុយជាមួយគោលការណ៍របស់ក្រុមហ៊ុន ហ្វេសប៊ុកពាក់ព័ន្ធកូវីដ-១៩។
លោកស្រី Courtney Parella អ្នកនាំពាក្យយុទ្ធនាការឃោសនាបោះឆ្នោតរបស់លោកត្រាំបានបញ្ជាក់ថា សកម្មភាពរបស់ក្រុមហ៊ុនហ្វេសប៊ុក មានសកម្មភាពលម្អៀង ដើម្បីប្រឆាំងប្រធានាធិបតី។ជាមួយគ្នានោះលោកស្រី Courtney Parella បានបញ្ជាក់ថា បណ្តាញសង្គម ប្រព័ន្ធផ្សព្វផ្សាយមិនមែនជាអាជ្ញាកណ្តាលកាត់ក្តីនោះឡើយ។
ក្រុមហ៊ុន ហ្វេសប៊ុក បានប្រកាសឲ្យដឹងថា នេះមិនមែនជាលើកទីមួយទេដែលបណ្តាញសង្គម បានដកអត្ថបទរបស់លោកត្រាំ ប៉ុន្តែសម្រាប់ហ្វេសប៊ុកនេះជាលើកទីមួយដែលបានដកការផ្សាយរបស់លោកត្រាំពាក់ព័ន្ធកូវីដ-១៩។
កន្លងមក អគ្គនាយកក្រុមហ៊ុនហ្វេសប៊ុក លោកMark Zuckerberg បានទទួលរងការរិះគន់យ៉ាងខ្លាំងពីបុគ្គលិករបស់ខ្លួន ដែលមិនមានសកម្មភាពប្រឆាំងនឹងលោកត្រាំពាក់ព័ន្ធអត្ថបទ ស្តីពីបាតុកម្មរើសអើងជាតិសាសន៍នាពេលកន្លងមក៕ធី រីណា
