សារព័ត៌មាន នគរវត្ត តែងតែនាំមុខគេជានិច្ច
អន្តរជាតិ៖ បន្ទាប់ពីក្រសួងសុខាភិបាលកម្ពុជា បានប្រកាសពីឆ្លងជាបន្តបន្ទាប់ ក្នុងនោះមានសមាជិកចំនួន ៤នាក់នៃសហគមន៍ស្ថានទូតអាមេរិក ត្រូវបានធ្វើតេស្តឃើញវិជ្ជមាន COVID-19 ។ ស្រាប់តែនៅថ្ងៃទី៥ខែសីហាម្សិលមិញនេះស្ថានទូតអាមេរិកប្រចាំកម្ពុជា បានសរសេរបញ្ជាក់នៅលើទំព័រហ្វេសប៊ុករបស់ខ្លួនថា៖ គ្មានឡើយករណីវិជ្ជមាន COVID-19 នៅក្នុងសហគមន៍នៃស្ថានទូត។
នៅក្នុងសារបញ្ជាក់របស់ស្ថានទូតអាមេរិក បានសរសេរថា «សមាជិកបួននាក់នៃសហគមន៍ក្នុងស្ថានទូតអាមេរិក ត្រូវបានធ្វើតេស្តឃើញវិជ្ជមានCOVID-19 បន្ទាប់ពីមកដល់កម្ពុជា ។ ប៉ុន្តែពួកគេត្រូវបានដាក់ឲ្យនៅដាច់ពីគេយ៉ាងតឹងរឹងសម្រាប់រយៈពេលចត្តាឡីស័ក ហើយគ្មានឃើញមានរោគសញ្ញានៅក្នុងអំឡុងពេលនោះទាំងមូល ហើយតាំងពីពេលនោះ ឆ្លងកាត់ការធ្វើតេស្តពីរដង ដោយលទ្ធផលអវិជ្ជមានទាំងពីរដង»។
ស្ថានទូតអាមេរិក បានបញ្ជាក់ទៀតថា បច្ចុប្បន្នពួកគេកំពុងយកចិត្តទុកដាក់ក្នុងការទប់ទល់ការរាលដាលកូវីដ-១៩ ដោយគោរពតាមលក្ខខ័ណ្ឌទាំងអស់របស់រដ្ឋាភិបាលកម្ពុជា ចំពោះ ការមកដល់ ការធ្វើតេស្ត និងការធ្វើចត្តាឡីស័កនៃបុគ្គលិកស្ថានទូតនិងសមាជិកគ្រួសារទាំងអស់របស់គេ។ ដោយ«បុគ្គលិកទាំងអស់របស់ស្ថានទូតត្រូវតែមានលទ្ធផលតេស្តអវិជ្ជមានCOVID-19 មុនពេលធ្វើដំណើរមកកម្ពុជាបន្តិច ត្រូវបានដាក់ឲ្យនៅដាច់ពីគេ ហើយត្រូវបានតេស្តឡើងវិញនៅពេលមកដល់ ហើយត្រូវធ្វើតេស្តងម្តងទៀតមុនពេលបញ្ចប់ចត្តាឡីស័ក ។
គួរបញ្ជាក់ថា ២ករណីដំបូងក្នុងសហគមន៍ស្ថានទូតអាមេរិក គឺស្ត្រីវ័យ២៧ឆ្នាំនិងទារិកាវ័យ១៥ខែ ដែលត្រូវបានប្រកាសកាលពីថ្ងៃទី១៧ខែកក្កដា។ចំណែក១ករណីទៀតនៅថ្ងៃទី៣០ ខែកក្កដា និង១ករណីចុងក្រោយនៅថ្ងៃទី៤ ខែសីហា ហើយបច្ចុប្បន្នពួកគាត់សុទ្ធតែជាសះស្បើយ។
សូមជម្រាបថា ក្នុងប្រតិបត្តិការប្រឆាំងជំងឺឆ្លង COVID-19 ដែលជាជំងឺដ៏កាចសាហាវមួយនេះ សហរដ្ឋអាមេរិកបានរួមចំណែកនូវជំនួយជាង១១លានដុល្លារ ដល់កម្ពុជាផងដែរ ៕ដោយ៖ស តារា
