សាច់មាន់ក្លាស្សេ ដែលនាំពីប្រទេសប្រេស៊ីល ចូលទៅប្រទេសចិន មានវិជ្ជមានចំពោះវីរុសកូរ៉ូណា

អន្តរជាតិ៖ កាលពីថ្ងៃព្រហស្បតិ៍ ទី១៣ ខែសីហា ឆ្នាំ២០២០នេះ រដ្ឋាភិបាលទីក្រុង Shenzhen បានប្រកាសថា សំណាកស្លាបមាន់ក្លាស្សេដែលបាននាំមកពីប្រទេសប្រេស៊ីល ចូលទៅក្នុងទីក្រុង Shenzhen ភាគខាងត្បូងប្រទេសចិន ត្រូវបានធ្វើតេស្តវិជ្ជមានចំពោះវីរុសកូរ៉ូណា ។

នៅក្នុងសេចក្តីជូនដំណឹងរបស់រដ្ឋាភិបាលទីក្រុង Shenzhen  បាននិយាយថា សំណាកនេះត្រូវបានយកចេញពីស្លាបមាន់ជាច្រើន និងត្រូវបានធ្វើតេស្តដោយមជ្ឈមណ្ឌលត្រួតពិនិត្យជំងឺក្នុងតំបន់កាលពីថ្ងៃពុធ ។

ជុំវិញបញ្ហានេះដែរ អាជ្ញាធរសុខាភិបាលទីក្រុង Shenzhen បានតាមដាននិងធ្វើតេស្តមនុស្សគ្រប់រូបដែលប្រហែលជាមានទំនាក់ទំនងជាមួយផលិតផលអាហារ ហើយថែមទាំងបានធ្វើតេស្តផលិតផលអាហារដែលផ្ទុកនៅក្បែរបណ្តុំមេរោគនោះផងដែរ ប៉ុន្តែសេចក្តីជូនដំណឹងបាននិយាយថាលទ្ធផលទាំងអស់គឺអវិជ្ជមាន ។

ដោយឡែកទីស្នាក់ការកណ្តាលនៃការបង្ការ និងទប់ស្កាត់រោគរាតត្បាតទីក្រុងShenzhen ក៏បាននិយាយថា សាធារណជនចាំបាច់ត្រូវមានការប្រុងប្រយ័ត្ន នៅពេលមានការនាំចូលសាច់ និងអាហារសមុទ្រ ហើយត្រូវតែមានការប្រុងប្រយ័ត្នដើម្បីកាត់បន្ថយហានិភ័យនៃការឆ្លង ។

ជាមួយគ្នានោះដែរ ប្រទេសចិន កាលពីថ្ងៃពុធសប្ដាហ៍នេះ បានរាយការណ៍ថា វីរុសកូរ៉ូណាត្រូវបានរកឃើញលើកញ្ចប់អាហារសមុទ្រក្លាស្សេដែលនាំចូលពីប្រទេសអេក្វាឌ័រ ហើយទីក្រុងជាច្រើនទៀត ក៏បានរាយការណ៍ពីករណីនៃអាហារសមុទ្រដែលកខ្វក់ចាប់តាំងពីខែមិថុនាំមកម្ល៉េះ ។

គួរបញ្ជាក់ថា បច្ចុប្បន្នប្រទេសចិន បាននឹងកំពុងត្រួតពិនិត្យរាល់កុងតឺន័រទាំងអស់ដែលផ្ទុកសាច់ និងគ្រឿងសមុទ្រ នាំចូលមកកំពង់ផែធំៗចាប់តាំងពីខែមិថុនា នៅពេលដែលការផ្ទុះឡើងថ្មីនូវជំងឺកូវីដ ១៩ នៅក្នុងរដ្ឋធានីប៉េកាំងត្រូវបានផ្សារភ្ជាប់ទៅនឹងផ្សារគ្រឿងសមុទ្រ Xinfadi ៕ដោយ៖ស តារា