បញ្ជូននារីម្នាក់ទៅតុលាការ ក្រោយឆបោកប្រជាពលរដ្ឋទិញតាមអនឡាញជាល្បិចបោកប្រាស់មួយស្នៀតទៀត

ភ្នំពេញ៖ កម្លាំងនគរបាលនាយកដ្ឋានប្រឆាំងបទល្មើសបច្ចេកវិទ្យា ក្រសួងមហាផ្ទៃ នៅថ្ងៃទី១៣ ខែសីហា ឆ្នាំ២០២០នេះ បានបង្ហាញមុខនារីម្នាក់ ដែលជាជនឆបោកប្រជាពលរដ្ឋ ចូលចិត្តទិញទំនិញតាមអនឡាញ ក្រោយសាកសួរចប់នីតិវិធី រួចបញ្ជូនខ្លួនទៅសាលាដំបូងរាជធានីភ្នំពេញ ដើម្បីចាត់ការតាមច្បាប់ ។

បើយោងតាមការចុះផ្សាយពី នាយកដ្ឋានប្រឆាំងបទល្មើសបច្ចេកវិទ្យា បានឲ្យដឹងថា កាលពីថ្ងៃទី១០ ខែសីហា ឆ្នាំ២០២០ ក្រោមការចង្អុលបង្ហាញពី ឯកឧត្តម នាយឧត្តមសេនីយ៍ សន្ដិបណ្ឌិត នេត សាវឿន អគ្គស្នងការនគរបាលជាតិ កម្លាំងនាយកដ្ឋានប្រឆាំងបទល្មើសបច្ចេកវិទ្យា ក្រោមការដឹកនាំបញ្ជាផ្ទាល់ពី ឯកឧត្តម ឧត្តមសេនីយ៍ឯក ជា ពៅ ប្រធាននាយកដ្ឋាន បានសហការជាមួយព្រះរាជអាជ្ញា នៃអយ្យការអមសាលាដំបូងរាជធានីភ្នំពេញ និងស្នងការដ្ឋាននគរបាលខេត្តកណ្តាល បានស្រាវជ្រាវបង្ក្រាប ករណីឆបោកប្រាក់ពីប្រជាពលរដ្ឋចំនួន០៦នាក់ (៤នាក់នៅរាជធានីភ្នំពេញ ១នាក់នៅខេត្តកំពង់ស្ពឺ ១នាក់នៅខេត្តបន្ទាយមានជ័យ) តាមបណ្តាញសង្គមហ្វេសប៊ុក។ ជនសង្ស័យដែលត្រូវបានឃាត់ខ្លួន ឈ្មោះ ជឿន សុខុន ហៅ ជឿន ស្រីមុំ ឬស្រីមុំ ភេទស្រី អាយុ ៣៤ឆ្នាំ ជនជាតិខ្មែរ មានទីលំនៅ ភូមិតាដោល៣ ឃុំអំពៅព្រៃ ស្រុកកណ្តាលស្ទឹង ខេត្តកណ្តាល។

ជនសង្ស័យបានប្រើប្រាស់គណនីហ្វេសប៊ុក ចំនួន០៣គឺ “ពិភពម៉ូត” “ស្នាដៃរាជនីកំពូលសម្រស់” និង ”Srey Mum” ក្នុងការផ្សព្វផ្សាយលក់ផលិតផលដូចជា ម៉ាសការពារវីរុស ឡេ និងផលិតផលជាច្រើនទៀត ដែលមានតម្លៃក្រោមទីផ្សារដើម្បីទាក់ទាញអតិថិជន ហើយជនសង្ស័យតម្រូវឱ្យអតិថិជនបង់ប្រាក់៥០ភាគរយជាមុន។ ប៉ុន្តែបន្ទាប់ពីបានទទួលលុយហើយ គាត់មិនបានប្រគល់ទំនិញឱ្យតាមការសន្យានោះទេ។ បច្ចុប្បន្នជនសង្ស័យកំពុងត្រូវបានបញ្ជូនទៅអយ្យការអមសាលាដំបូងនៃរាជធានីភ្នំពេញ ដើម្បីចាត់ការតាមផ្លូវច្បាប់។

សូមបញ្ជាក់ជូនដល់បងប្អូនប្រជាពលរដ្ឋថា ប្រសិនបើបងប្អូនត្រូវបានឆបោក ដោយជនសង្ស័យដែលប្រើគណនីហ្វេសប៊ុកទាំង០៣ខាងលើនេះ សូមបងប្អូនរាយការណ៍ជូនទៅអយ្យការអមសាលាដំបូងនៃរាជធានីភ្នំពេញដើម្បីដាក់បន្ទុកបន្ថែម។

សូមបងប្អូនប្រុងប្រយ័ត្នល្បិចបោករបស់ជនល្មើសប្រើគ្រប់រូបភាពនេះសមត្ថកិច្ចចាប់បានករណីខាងលើបង្ហាញឲ្យបងប្អូនឃើញ៕

ដោយ៖អរុណរះ