សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ តារាចម្រៀងប្រចាំផលិតកម្ម Zone កញ្ញា ណាណៃ បានបញ្ចេញបទចម្រៀងថ្មីរបស់ខ្លួនហើយគឺបទ “បាត់បងគ្មានហេតុផល”។ បញ្ចេញជាMVភ្លាមបទចម្រៀងនេះទទួលបានការចាប់អារម្មណ៍ច្រើនខណៈការសម្តែងរួមគ្នាលើកដំបូងជាមួយលោក Kavin ហាក់ស៊ីចង្វាក់គ្នាខ្លាំងរហូតពួកគេបង្ហាញអារម្មណ៍ល្អរៀងខ្លួនក្រោយបានឃើញស្នាដៃមួយនេះចេញជារូបរាង។
ស្នាដៃបទចម្រៀងថ្មីអមដោយMVដ៏ទាក់ទាញរបស់កញ្ញា ណាណៃ ទទួលបានការចូលទស្សនារាប់សែនដងហើយក្រោយពីបញ្ចេញមិនបានប៉ុន្មានថ្ងៃផង។ អ្វីដែលទទួលបានការពេញចិត្តក្រៅពីទឹកដមសំនៀង និងអត្ថន័យស្នេហាមនោសញ្ចេតនាស៊ីជម្រៅនោះគឺជាការជួបគ្នាលើកដំបូងរបស់តារាចម្រៀង ស្រីវ័យក្មេងរូបនេះនិងតារាសម្តែងមានមន្តស្នេហ៍លោក Kavin។
កញ្ញា ណាណៃ បញ្ជាក់ថា មានការបារម្ភខ្លាំងមុនថ្ងៃថតមកដល់ព្រោះតែតារាសម្តែងប្រុសនាងមិនដែលបានស្គាល់ និងរួមសម្តែងពីមុនមកនោះទេ។ ទោះជាយ៉ាងណានាងហាក់ធូរអារម្មណ៍ក្រោយពីបានសម្តែងរួមគ្នា ហើយនាងបានសរសើរលើតារាសម្តែងប្រុសរូបនេះថាមិនត្រឹមតែសង្ហាទេ ក៏ចិត្តល្អរួសរាយរាក់ទាក់ និងជួយណែនាំនាងនៅការសម្តែងខ្លះដែលខ្វះចន្លោះផងដែរហើយនាងពិតជាចូលចិត្តការសម្តែងបែបនេះ។ នាងថាពិតជាមានអារម្មណ៍ល្អមិនធ្លាប់ជួបក្រោយសម្តែងបទចម្រៀងមួយនេះដែលនាងរំពឹងថានឹងមានឱកាសសម្តែងរួមគ្នាបន្តនៅថ្ងៃក្រោយ។
តារាសម្តែង លោក Kavin វិញក៏បង្ហាញពីអារម្មណ៍ល្អនឹងការសម្តែងបទនេះពិសេសមានអារម្មណ៍មួយដក់ជាប់នឹងទិដ្ឋភាពនៃការសម្តែងទាំងមូល ហើយលោកពិតជាស្វាគមន៍ និងរីករាយប្រសិនបើមានឱកាសសម្តែងរួមគ្នាជាមួយតារាចម្រៀងស្រីរូបនេះ។
គួរបញ្ជាក់ដែរថាប៉ុន្មានថ្ងៃមុននេះផលិតកម្ម Zone បានបង្ហោះ MV បទចម្រៀង “បាត់បងគ្មានហេតុផល” ដែលច្រៀងដោយកញ្ញា ណាណៃ និងនិពន្ធដោយលោក សូរ រៈបូរី នោះបានចេញជាផ្លូវការហើយព្រមទាំងទទួលបានការគាំទ្រយ៉ាងច្រើនលើសលប់ពីមិត្តយុវវ័យទៀតផងជាមួយពាក្យពេចន៍សរសើរមិនដាច់ពីមាត់ថា ពិរោះ មានអត្ថន័យស៊ីជម្រៅនិងផលិតឡើងប្រកបដោយគុណភាព៕ ដោយ៖ វឌ្ឍនា
