សារព័ត៌មាន នគរវត្ត តែងតែនាំមុខគេជានិច្ច
ខេត្តកែប៖យោងតាមផេកការិយាល័យផ្សព្វផ្សាយតាមបណ្តាញសង្គមបានឲ្យដឹងថា នៅព្រឹកថ្ងៃចន្ទ ទី១៧ ខែសីហា ឆ្នាំ២០២០ លោកសោម ពិសិដ្ឋ អភិបាលនៃគណ:អភិបាលខេត្តកែប បានដឹកនាំមន្រ្តីជំនាញ និងយុវជនចុះត្រួតពិនិត្យការរៀបចំជញ្ជីងយុត្តិធម៌នៅផ្សារក្តាម ដើម្បីទទួលបានតម្លាភាពទាំងអ្នកទិញ ទាំងអ្នកលក់។
ក្នុងការចុះត្រួតពិនិត្យដោយផ្ទាល់ជាមួយមន្រ្តីជំនាញនាថ្ងៃនេះ លោកអភិបាលខេត្តកែបមានប្រសាសន៍ថា រូបលោកផ្ទាល់តែងតែឮពាក្យថា អាជីវករនៅផ្សារក្តាមខេត្តកែបលក់ដូរកោរភ្ញៀវមិនដាក់ទឹកទេ ហើយថ្លឹងទំនិញឲ្យភ្ញៀវមិនគ្រប់គីឡូទៀត។ ខណៈពេលនេះ រដ្ឋបាលខេត្ត បានចាត់មន្រ្តីជំនាញមកដាក់បន្ថែមទៀតនូវទីតាំងជញ្ជីងយុត្តិធម៌ស្ទើរតែគ្រប់ទីកន្លែងនៅក្នុងផ្សាក្តាម ហេតុនេះសូមបងប្អូនភ្ញៀវទេសចរលែងមានក្តីបារម្ភទៀតទៅ។ពេលដែលទិញទំនិញពីអាជីវករនៅផ្សារក្តាមហើយបងប្អូនមានការសង្ស័យថាទំនិញមិនគ្រប់គីឡូ បងប្អូនអាចយកមកដាក់ថ្លឹងនៅជញ្ជីងយុត្តិធម៌ទាំងនេះបានដោយឥតគិតថ្លៃ ឡើយដែលមានចំនួន៤ទីតាំងនៅផ្សារក្តាមនេះ ។
អភិបាលខេត្តបានបន្ថែមទៀតថា ករណីដែលមន្ត្រីជំនាញរកឃើញថា មានអាជីវកររូបណាលក់អីវ៉ាន់ឲ្យភ្ញៀវដោយបានក្លែងបន្លំមិនគ្រប់គីឡូ អាជីវកររូបនោះនឹងទទួលនូវការពិនយ័ពីរដ្ឋបាលខេត្ត ឬបិទកន្លែងអាជីវកម្ម និងអាចទទួលខុសត្រូវជាមួយច្បាប់ទៀតផង។
បន្ទាប់ពីបានត្រួតពិនិត្យទីតាំងដាក់ជញ្ជីងយុត្តិធម៌រួចមក អភិបាលខេត្ត និងក្រុមការងារ បានចុះអប់រំ ណែនាំ ផ្សព្វផ្សាយពីវិធានការការពារជំងឺកូវីដ-១៩ ព្រមទាំងបានចែកម៉ាស់ និងខិត្តប័ណ្ណផ្សព្វផ្សាយ ដល់បងប្អូនអាជីវករ និងភ្ញៀវទេសចរជាតិ អន្តរជាតិដែលមកកម្សាន្តនៅខេត្តកែបផងដែរ ៕ដោយ៖អរុណរះ
