សារព័ត៌មាន នគរវត្ត តែងតែនាំមុខគេជានិច្ច
ភ្នំពេញេ ៖ យុវជន២នាក់បើកម៉ូតូឌុបគ្នាដល់ផ្លូវបំបែកជាបួនមិនប្រយ័ត្នត្រូវរថយន្តមិនចាំម៉ាកបុកពីក្រោយបណ្តាលឲ្យខ្ទាតទៅបោកក្បាលនឹងបង្គោលថ្មស្លាប់ម្នាក់ របួសម្នាក់។
ហេតុការណ៍នេះបានកើតឡើងនៅម៉ោង ២រសៀល ថ្ងៃទី១៨ ខែសីហា ឆ្នាំ ២០២០ នៅចំណុចផ្លូវ ៥០ ម៉ែត្រ ក្នុងភូមិព្រែកថ្លឹង សង្កាត់ជើងឯក ខណ្ឌដង្កោ រាជធានីភ្នំពេញ ។
បុរសដែលស្លាប់មានឈ្មោះម៉ាន អេង មុខរបរនៅផ្ទះ បច្ចុប្បន្នស្នាក់នៅផ្ទះជួលម្តុំទួលពង្រ មានស្រុកកំណើតនៅភូមិស្អាង ឃុំត្រពាំងគរ ស្រុកជើងព្រៃ ខេត្តកំពង់ចាម ។
ប្រភពព័ត៌មានពីមិត្តភក្តិជនរងគ្រោះបានឲ្យដឹងថា មុនពេលកើតហេតុខ្លួននិងជនរងគ្រោះដែលអង្គុយពីក្រោយបានជិះម៉ូតូឌុបគ្នាម៉ាកហុងដា ប៊ីត ពាក់ស្លាកលេខ ស្វាយរៀង 1N-2514ធ្វើដំណើរតាមផ្លូវ ៥០ ម៉ែត្រក្នុងទិសដៅពីលិចទៅកើតបម្រុងទៅយកមិត្តភក្តិនៅតាខ្មៅ តែពេលមកដល់ចំណុចកើតហេតុផ្លូវបែកជាបួនស្រាប់តែមានរថយន្តមួយគ្រឿងមិនចាំម៉ាកធ្វើដំណើរក្នុងទិសដៅពីជើងទៅត្បូង បានជ្រុលមកបុកពីក្រោយធ្វើឲ្យខ្ទាតម៉ូតូប្រហែល១០ម៉ែត្រទៅបោកក្បាលនឹងបង្គោលថ្មបណ្តាលឲ្យធ្លាយខួរស្លាប់ភ្លាមៗ ចំណែកអ្នកបើកម៉ូតូរងរបួសស្រាល។
បន្ទាប់ពីកើតហេតុ សមត្ថកិច្ចមូលដ្ឋានបានចុះមកដល់ សហការជាមួយជំនាញចរាចរណ៍ ស្វែងរកជនបង្កដើម្បីនាំយកមកចាត់ការតាមផ្លូវច្បាប់ រួចធ្វើកំណត់ហេតុប្រគល់សព ជូនទៅក្រុមគ្រួសារយកទៅធ្វើបុណ្យតាមប្រពៃណីនៅឯស្រុកកំណើត ៕
ដោយ៖ជ្រោយពេជ្រ
