សារព័ត៌មាន នគរវត្ត តែងតែនាំមុខគេជានិច្ច
ខេត្តតាកែវ៖ បើតាមការបញ្ជាក់ពីព្រះតេជគុណ ជួន កក្កដា ចៅអធិការវត្ត ប្រាសាទនាងខ្មៅបានឲ្យដឹងថា កាលពីរាត្រីថ្ងៃអង្គារទី១៨ ខែសីហា ឆ្នាំ២០២០ ក្រសួងសុខាភិបាលបានចុះយកកំហាកព្រះសង្ឃចំនួន៣៤ អង្គ នៅវត្តប្រាសាទ នាងខ្មៅ ខេត្តតាកែវដើម្បីពិនិត្យរកជំងឺកូវីដ-១៩ ប៉ុន្តែជាលទ្ធផលបានបង្ហាញថា គ្រាន់តែជាជំងឺផ្តាសាយធម្មតាប៉ុណ្ណោះ ។
តាមព្រះតេជគុណព្រះធម្មវិជ្ជា ជួន កក្កដា ព្រឹទ្ធបុរសរង នៃសាកលវិទ្យាល័យព្រះសីហនុរាជ និងជាចៅអធិការវត្តប្រាសាទនាងខ្មៅ បានឲ្យដឹងនៅព្រឹកថ្ងៃទី១៩ ខែសីហា នេះថា “សូមប្រគេនជូនជាព័ត៌មានដល់ពុទ្ធបរិស័ទនិងប្រជាពលរដ្ឋដែលរស់នៅមូលដ្ឋានឃុំរវៀង ស្រុកសំរោង ខេត្តតាកែវ ទាំងអស់ឲ្យបានជ្រាបថា នារាត្រីថ្ងៃអង្គារ ទី១៨ ខែ សីហា ឆ្នាំ២០២០ ក្រសួង សុខាភិបាល បានចុះមកយកកំហាកព្រះសង្ឃចំនួន៣៤អង្គក្នុងវត្តប្រាសាទនាងខ្មៅ ដើម្បីយកទៅពិនិត្យក្រែងមានផ្ទុកជំងឺកូវីដ-១៩ ប៉ុន្តែពេលនេះជាលទ្ធផលបានចេញមកហើយ គឺជំងឺផ្តាសាយធម្មតាប៉ុណ្ណោះ ។ ព្រះអង្គក៏បានអំពាវនាវសូមពុទ្ធបរិស័ទ និងប្រជាពលរដ្ឋទាំងអស់ក្នុងមូលដ្ឋានមេត្តាកុំមានការភ្ញាក់ផ្អើល តាមការបំផុសបំផុលតាមបណ្តាញសង្គមហ្វេសប៊ុកឲ្យសោះ ព្រោះជាព័ត៌មានមិនពិតទេ”។
ប្រភពមួយបានឱឲ្យដឹងថាថ្មីៗនេះ ព្រះចៅអធិការវត្ត នាងខ្មៅ និងព្រះសង្ឃផ្សេងទៀត មានអាការៈផ្ដាសាយ ហើយបានទៅព្យាបាលនៅផ្ទះគ្រូពេទ្យជាប់វត្ត ដែលជាគ្រូពេទ្យ ប្រចាំជាបន្តបន្ទាប់ ហើយគ្រូពេទ្យមិនយកថវិកា ទើបចៅអធិការវត្តបង្ហោះសារ ក្នុងបណ្ដាញសង្គមថ្លែងអំណរគុណដល់គ្រូពេទ្យ ហើយប្រជាពលរដ្ឋឃើញបែបនេះក៏យកព័ត៌មាន នោះទៅបន្តផ្សព្វផ្សាយបន្តគ្នា ធ្វើឲ្យមានភាពភ្ញាក់ផ្អើលនិងភ័ន្តច្រឡំ រហូតមានការទំនាក់ទំនង ចូលទៅទូរស័ព្ទលេខ១១៥ ជាលេខពិសេសក្នុងការទាក់ទងជំងឺកូវីដ-១៩សុំឲ្យជួយធ្វើអន្តរាគមន៍ ចុះពិនិត្យតែម្តង។
ដោយឡែកលោកស្រី យក់ សម្បត្តិ រដ្ឋលេខា ធិការក្រសួងសុខាភិបាលបានប្រាប់ព័ត៌មានថា ក្រោយពីទទួលបានព័ត៌មានពាក់ព័ន្ធនឹងព្រះសង្ឃនៅវត្តនាងខ្មៅខាងលើនេះ លោកស្នងការរងផែនការងារសន្ដិសុខខេត្តតាកែវ សហការជាមួយអាជ្ញាធរពាក់ព័ន្ធចុះដល់ទីតាំងវត្ត ប្រាសាទនាងខ្មៅដោយលទ្ធផលពិនិត្យឃើញថា ព្រះសង្ឃមានជំងឺផ្ដាសាយ សរុបចំនួន២៨អង្គ ហើយអាជ្ញាធរស្នើសុំឲ្យគង់នៅក្នុងកុដិដោយឡែក និងពួកគាត់ត្រៀមខ្លួនសហការ តាមជំនាញរបស់សុខាភិបាល។
ពាក់ព័ន្ធជំងឺកូវីដ-១៩វិញបើគិតត្រឹមព្រឹកថ្ងៃទី១៩ ខែសីហា ឆ្នាំ២០២០ នៅកម្ពុជា បានរកឃើញអ្នកមានវីរុសកូវីដ-១៩ មានចំនួនសរុប២៧៣នាក់ (ស្រី្ត៥៤នាក់ និងបុរស ២១៩នាក់) ក្នុងនោះចំនួនអ្នកព្យាបាលជាសះស្បើយសរុបទូទាំងប្រទេស មានចំនួន២៥១នាក់ (ស្រី៥២នាក់ និងបុរស ១៩៩ នាក់) និង អ្នកសម្រាកព្យាបាលនៅក្នុងមន្ទីរពេទ្យរដ្ឋ និងឯកជន មានចំនួនសរុប២២នាក់៕ដោយ៖ប្រាថ្នា
