សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ ជាការគិតគូរពីសុខសុវត្ថិភាព និងប្រសិទ្ឋភាព នៃវិធានការការពារជំងឺ COVID-19 ដល់ប្រជាពលរដ្ឋ ដែលចូលផ្សារទំនើប អ៉ីអនម៉ល សាខាទី១ តាមការអំពាវនាវរបស់រាជដ្ឋាភិបាល នៅរសៀលថ្ងៃអង្គារ ៧កេីត ខែភទ្របទ ឆ្នាំជូត ទោស័ក ព.ស.២៥៦៤ ត្រូវនឹងថ្ងៃទី២៥ ខែសីហា ឆ្នាំ២០២០ រដ្ឋបាលខណ្ឌចំការមន ដឹកនាំដោយលោក ថេង សុថុល អភិបាល នៃគណៈអភិបាលខណ្ឌចំការមន ចុះត្រួតពិនិត្យអំពីវិធានការការពារ និងទប់ស្កាត់ជំងឺកូវីដ~១៩ នៅក្នុងបរិវេណផ្សារទំនេីបអ៉ីអនម៉ល ដែលស្ថិតនៅតាមបណ្ដោយមហាវិថីសម្តេចសុធារស ភូមិ៨ សង្កាត់ទន្លេបាសាក់ ខណ្ឌចំការមន រាជធានីភ្នំពេញ ។
ក្នុងការចុះពិនិត្យនេះ ក្រុមការងារ បានសង្កេតឃើញថា ផ្សារមានការគ្រប់គ្រងបានល្អ ក្នុងការអនុវត្តតាមវិធានរបស់ក្រសួងសុខាភិបាល បានត្រឹមត្រូវ ដោយនៅតាមច្រកចេញ~ចូលផ្សារ ប្រមាណ១៤ច្រក ខាងផ្សារបានដាក់បុគ្គលិកប្រចាំ ដោយមានបាញ់អាល់កុលលាងដៃ មានវាស់កំដៅ ម៉ាស៊ីនស្កេនកំដៅតាមប្រព័ន្ឋកុំព្យូទ័រ គ្រប់ច្រកចូលទាំងអស់ ។
ជាមួយគ្នានេះ លោក ថេង សុថុល អភិបាលខណ្ឌចំការមន ក៏បានណែនាំដល់អ្នកគ្រប់គ្រង អ្នកមើលការខុសត្រូវ ចូរបង្កើនការយកទុកដាក់បន្ថែមទៀត ចំពោះបុគ្គលិកបម្រើការនៅក្នុងផ្សារ ពិសេសអាជីវករលក់ដូរក្នុងផ្សារ អោយមានការប្រុងប្រយ័ត្នបន្ថែមលើវិធានដែលខាងផ្សារបានដាក់បម្រើ ដូចជាទឹកអាល់កុលលាងដៃ មុននឹងចូលក្នុងហាង ឬចូលកន្លែងលក់ម្ហូបអាហារ ។
លោកអភិបាលខណ្ឌ បានទទូចសុំអោយអ្នកមើលការខុសត្រូវផ្សារ ដើរប្រាប់ដល់អតិថិជន ឬភ្ញៀវចូលហាង សូមកុំមានការជួបជុំគ្នាច្រើនគ្នា ដើម្បីទប់ស្កាត់នូវការចម្លង ឬការរីករាលដាលនៃជំងឺផ្លូវដង្ហើមប្រភេទថ្មីនេះ នៅក្នុងប្រទេសកម្ពុជា ដូចដែលប្រមុខរាជរដ្ឋាភិបាល បានប្រកាសប្រយុទ្ធប្រឆាំងទប់ស្កាត់ការរីករាលដាលនៃជំងឺនេះ ដើម្បីសុខសុវត្ថិភាពជូនប្រជាពលរដ្ឋ ៕
ដោយ៖ជី ណា
