សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ បុរសម្នាក់ចុចទូរស័ព្ទបណ្ដេីរបើករថយន្តបណ្ដេីរធ្វើឱ្យជ្រុលទៅបុកគូទរថយន្តមួយគ្រឿងបណ្តាលឲ្យរងការខូចខាត ហើយម្ចាស់រថយន្តទាំងពីរគ្រឿងជជែកគ្នានៅនឹងកន្លែងកើតហេតុអស់មួយសន្ទុះធំ កាលពីវេលាម៉ោង១០ និង៣០នាទីព្រឹក ថ្ងៃទី២៨ ខែសីហា ឆ្នាំ២០២០ ស្ថិតនៅតាមបណ្តោយផ្លូវលេខ៣៧១ ក្នុងសង្កាត់បឹងទំពុន២ ខណ្ឌមានជ័យ រាជធានីភ្នំពេញ។
បេីតាមប្រភពព័ត៌មានពីកន្លែងកើតហេតុ បានឲ្យដឹងថា មុនពេលកើតហេតុគេឃើញបុរសម្នាក់បើករថយន្តម៉ាក Highlander មួយគ្រឿង ពណ៌ទឹកប្រាក់ ពាក់ស្លាកលេខ ភ្នំពេញ 2BF-5875 ធ្វើដំណើរតាមបណ្តោយផ្លូវលេខ៣៧១ ក្នុងទិសដៅពីលិចទៅកើត ដោយពេលបើកបរក៏បានចុចទូរស័ព្ទដៃ មិនប្រយ័ត្នក៏ជ្រុលទៅបុកគូទរថយន្តម៉ាក Lexus RX 330 មួយគ្រឿង ពណ៌ទឹកប្រាក់ ពាក់ស្លាកលេខ ភ្នំពេញ 2AE-7280 ដែលធ្វើដំណើរស្របទិសគ្នា បណ្តាលឲ្យរងការខូចខាតកាងខាងក្រោម។ តែសំណាងល្អក្នុងករណីគ្រោះថ្នាក់ចរាចរណ៍នេះ មិនបង្កឲ្យមាននរណាម្នាក់រងរបួសនោះទេ។
ក្រោយពេលកើតហេតុ ភាគីទាំងសងខាងបានសម្របសម្រួលគ្នា ដោយម្ចាស់រថយន្ត Lexus RX 330 ជាអ្នករងគ្រោះយល់ព្រមឲ្យភាគីខាងរថយន្ត Highlander ជាអ្នកបង្កយករថយន្តរបស់ខ្លួនទៅជួសជុលឲ្យដូចដើមវិញ ដើម្បីបញ្ចប់រឿងនៅនឹងកន្លែងតែម្តង៕
ដោយ៖ ភារ៉ា ដង្កោ
