សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ជនសង្ស័យចំនួន២នាក់បានជិះម៉ូតូឌុបគ្នាធ្វេីសកម្មភាពឆក់យកកាបូបពីបុរសម្នាក់បានសម្រេចហេីយព្យាយាមជិះម៉ូតូគេចខ្លួន តែត្រូវជនរងគ្រោះដេញតាមពីក្រោយរហូតដល់ជនសង្ស័យដួលម៉ូតូទេីបឃាត់បានម្នាក់កាលពីវេលាម៉ោង២១យប់ថ្ងៃទី១១ ខែកញ្ញា ឆ្នាំ២០២០ នៅតាមបណ្តោយមហាវិថីសហព័ន្ធរុស្ស៊ី ក្នុងភូមិព្រៃជីសាក់ សង្កាត់ចោមចៅទី៣ ខណ្ឌពោធិ៍សែនជ័យ បន្ទាប់មកសមត្ថកិច្ចក៏បានធ្វេីការស្រាវជ្រាវតាមចាប់បានម្នាក់ទៀត។
ជនសង្ស័យទី១-ឈ្មោះរិទ្ធ ឧត្តម ភេទប្រុស អាយុ១៨ឆ្នាំ មុខរបរមិនពិតប្រាកដ រស់នៅភូមិត្រពាំងថ្លាន់ សង្កាត់ពន្សាំង ខណ្ឌព្រៃព្នៅ និងទី២-ឈ្មោះព្រឹម ឃ្នីត ភេទប្រុស អាយុ១៨ឆ្នាំ មុខរបរមិនពិតប្រាកដ រស់នៅឃុំទួលព្រិច ស្រុកអង្គស្នួល ខេត្តកណ្តាល។
ចំណែកជនរងគ្រោះឈ្មោះម៉ម សុវណ្ណ ភេទប្រុស អាយុ២៨ឆ្នាំ មុខរបរកម្មកររោងចក្រ ស្នាក់នៅភូមិព្រៃជីសាក់ សង្កាត់ចោមចៅទី៣ ខណ្ឌពោធិ៍សែនជ័យ។
តាមសម្តីជនរងគ្រោះបានឲ្យដឹងថា មុនពេលកេីតហេតុរូបគាត់បានជិះម៉ូតូចេញពីផ្សារឡាក់គី នៅផ្លូវចោមចៅ បំណងទៅផ្ទះនៅភូមិព្រៃជីសាក់វិញ ។លុះធ្វេីដំណេីរមកដល់មហាវិថីសហព័ន្ធរុស្ស៊ី ស្រាប់តែលេចមុខជនសង្ស័យចំនួន២នាក់ជិះម៉ូតូម៉ាកស៊ុយហ្ស៊ុយគីនិចពណ៌ស ពាក់ស្លាកលេខភ្នំពេញ1DL- 0182 មកពីក្រោយហើយក៏ធ្វេីសកម្មភាពឆក់យកកាបូបពីហោប៉ៅអាវខាងស្តាំបានសម្រេចហេីយព្យាយាមគេចខ្លួន។
ជនរងគ្រោះបន្តថា ភ្លាមនោះរូបគាត់បានជីះម៉ូតូដេញតាមពីក្រោយរហូតទៅដល់បុរីញូវថោន ទេីបជនសង្ស័យភ័យពេកក៏ជិះម៉ូតូដួលហេីយព្យាយាមរត់គេចខ្លួនបន្តទៀតតែរូបគាត់ស្រែកថាចោរៗបង្កការភ្ញាក់ផ្អេីលដល់ប្រជាពលរដ្ឋដេញចាប់បានម្នាក់ភ្លាមៗនិងប្រគល់ជូននគរបាល។
ក្រោយពីធ្វេីការសាកសួរជនសង្ស័យរួចទេីបសមត្ថកិច្ចនាំខ្លួនទៅតាមចាប់បក្ខពួកម្នាក់ទៀតនៅក្នុងក្លិបមីតណាយ។
បច្ចុប្បន្នជនសង្ស័យត្រូវបានសមត្ថកិច្ចកសាងសំណុំរឿងបញ្ជូនទៅផ្នែកជំនាញនៃអធិការដ្ឋាននគរបាលខណ្ឌពោធិ៍សែនជ័យដេីម្បីចាត់ការតាមនីតិវិធី៕
ដោយ ៖ សុខាសែនជ័យ
