សារព័ត៌មាន នគរវត្ត តែងតែនាំមុខគេជានិច្ច
អន្តរជាតិ៖យន្តហោះសម្រាប់ហ្វឹកហាត់កម្លាំងទាហាននៅអ៊ុយក្រែនបានជួបគ្រោះថ្នាក់ធ្លាក់ពេលព្យាយាមចុះចតជាបន្ទាន់ បណ្តាលឲ្យឆាបឆេះយ៉ាងសន្ធោសន្ធៅសម្លាប់មនុស្ស ២២នាក់។
ហេតុការណ៍គ្រោះថ្នាក់ខាងលើនេះកើតឡើងនៅយប់ថ្ងៃទី២៥ខែកញ្ញា ពេលនោះយន្តហោះយោធាប្រភេទAn-26 របស់កម្លាំងទាហានអាកាសអ៊ុយក្រែន បានធ្លាក់នៅតំបន់ Kharkov ស្ថិតនៅភាគខាងជើងប្រទេសនេះ សម្លាប់មនុស្ស ២២នាក់។
មន្ត្រីគ្រប់គ្រងគ្រោះអាសន្ន ប្រទេសអ៊ុយក្រែនបានឲ្យដឹងថា យន្តហោះ ដឹកជញ្ជូនយោធាមានមនុស្ស ២៨នាក់នៅលើយន្តហោះ រួមទាំងក្រុមអាកាសយានិកបានធ្លាក់ពេលចុះចត ក្រោយវិលត្រឡប់មកពីហ្វឹកហាត់វិញ ។ ក្រៅពីអ្នកស្លាប់ ២២នាក់នៅមានមនុស្ស២នាក់រងរបួសធ្ងន់ និង៤នាក់ទៀតបាត់ខ្លួន។
ក្រុមពន្លត់អគ្គិភ័យបានទៅដល់កន្លែងកើតហេតុភ្លាមៗ ដើម្បីគ្រប់គ្រងស្ថានភាព ។ មកទល់ពេលនេះមិនទាន់ដឹងពីមូលហេតុបណ្តាលឲ្យមានគ្រោះថ្នាក់ខាងលើកើតឡើងនៅឡើយទេ៕
ដោយ៖ធី រីណា
