សារព័ត៌មាន នគរវត្ត តែងតែនាំមុខគេជានិច្ច
អន្តរជាតិ៖ បើតាមការចេញផ្សាយដោយសារព័ត៌មាន CNA នៅព្រឹកថ្ងៃចន្ទទី២៨ ខែកញ្ញា ឆ្នាំ២០២០នេះ បាននិយាយថា ក្រុមហ៊ុនជីវបច្ចេកវិទ្យាអូស្ត្រាលី អេណា (Ena Respiratory) នៅថ្ងៃចន្ទនេះបានប្រកាសថា ស្រ្ពាយបាញ់តាមច្រមុះ (nasal spray) ដែលខ្លួនកំពុងអភិវឌ្ឍអាចជំរុញ ឬដាស់ប្រព័ន្ធភាពសុំាឱ្យប្រយុទ្ធប្រឆាំង ក៏ដូចជាកាត់បន្ថយការកើនឡើងនៃវីរុសកូរ៉ូណា នៅក្នុងសិក្សាស្រាវជ្រាវមួយលើសត្វ។
ក្រុមហ៊ុន Ena Respiratory បានបញ្ជាក់នៅក្នុងសេចក្ដីថ្លែងការណ៍របស់ខ្លួនថា ស្រ្ពាយបាញ់តាមច្រមុះដែលមានឈ្មោះថា INNA-051 អាចនឹងត្រូវប្រើប្រាស់ ជាប្រភេទវ៉ាក់សាំងស្រ្ពាយបាញ់ច្រមុះ ដើម្បីកាត់បន្ថយកម្រិតឆ្លងវីរុសកូរ៉ូណាបានរហូតដល់ ៩៦ភាគរយ។ បន្ថែមពីនេះក្រុមហ៊ុននេះ តាមរយៈការធ្វើតេស្ដនៅលើសត្វបានជោគជ័យ ខ្លួនមានសង្ឃឹមថា INNA-051 អាចនឹងទទួលបានការអនុញ្ញាតក្នុងការដឹកនាំ ការធ្វើតេស្ដលើមនុស្សក្នុងពេលឆាប់ៗនេះ។
ក្រៅពីស្ព្រាយបាញ់ច្រមុះ ក្រុមអ្នកវិទ្យាសាស្ត្រអូស្ត្រាលីក៏កំពុងអភិវឌ្ឍវ៉ាក់សាំង COVID-19 ជាទូទៅផងដែរ ដោយកាលពីសប្តាហ៍មុននេះនាយករដ្ឋមន្ត្រីអូស្ត្រាលី លោក ស្កុត ម៉ូរីសុន បានអះអាងនៅចំពោះមុខអង្គការសហប្រជាជាតិថា អូស្ត្រាលីនឹងចែកចាយវ៉ាក់សាំង COVID-19 ទៅគ្រប់ទីកន្លែងទូទាំងពិភពលោក ប្រសិនបើខ្លួនអភិវឌ្ឍវាបានជោគជ័យ ។
គួរជម្រាបថា ក្រុមហ៊ុន Ena Respiratory បានប្រមូលថវិកាសរុប៨.២៤លានដុល្លារ សម្រាប់ការអភិវឌ្ឍវ៉ាក់សាំងស្រ្ពាយបាញ់តាមចម្រុះក្រោមការគំាទ្រ និងវិនិយោគពីក្រុមហ៊ុន ប្រ៊ែនដុនខេភីថល (Brandon Capital), រដ្ឋាភិបាលសហព័ន្ធអូស្ត្រាលី និងក្រុមហ៊ុន CSL ៕ដោយ៖សតារា
