សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ បុរសម្នាក់សង្ស័យស្រវឹងស្រាខ្លាំងហើយបានបើករថយន្តមួយគ្រឿងបោះពួយយ៉ាងលឿនជ្រុលទៅបុករបាំងថ្មពុះចែកទ្រូងផ្លូវបាក់១កង់និងវៀចជាច្រើនកង់ទៀត តែសំណាងល្អមិនបង្កឲ្យបងប្អូនអ្នកដំណើរណាម្នាក់រងរបួសនោះទេ។
ហេតុការណ៍នេះកើតឡើងនៅវេលាម៉ោង១២និង១០នាទីយប់រំលងអធ្រាត្រឈានចូលថ្ងៃទី៦ខែតុលាឆ្នាំ២០២០ ស្ថិតតាមបណ្ដោយមហាវិថីសហពន្ធ័រុស្សុី ត្រង់ចំណុចគល់ស្ពាន៧មករា ក្នុងសង្កាត់ទឹកថ្លា ខណ្ឌសែនសុខ រាជធានីភ្នំពេញ ។
យោងតាមប្រភពពីកន្លែងកើតហេតុបានឲ្យដឹងថា មុនពេលកើតហេតុគេឃើញបុរសម្នាក់ទំនងជាស្រវឹងស្រាខ្លាំងណាស់បានបើករថយន្តម៉ាក Ford Ranger ពណ៌ខ្លាញ់ក្ដាមពាក់ស្លាកលេខភ្នំពេញ2BD-4589 ធ្វើដំណើរក្នុងទិសដៅពីកើតទៅលិចចុះពីលើស្ពាន៧មករាបោះពួយក្នុងល្បឿនលឿន ខណៈមកដល់ចំណុចកើតហេតុដោយស្ថានភាពផ្លូវកោងផងនោះបានជ្រុលទៅបុករបាំងថ្មពុះចែកទ្រូងផ្លូវបាក់អស់១កង់និងវៀចជាច្រើនកង់ទៀត ហើយរថយន្តដាច់កាឡេកង់ទៅមុខលែងរួច។
ក្រោយកើតហេតុសមត្ថកិច្ចមូលដ្ឋានបានមកដល់ចំណុចកើតហេតុហើយទាក់ទងទៅនគរបាលជំនាញចរាចរណ៍ផ្លូវគោកមកវាស់វែងស្ទូចយករថយន្តបង្កទៅរក្សាទុករង់ចាំដោះស្រាយតាមផ្លូវច្បាប់៕ ដោយ៖ ភារ៉ា ដង្កោ
