កិច្ចពិភាក្សាថ្នាក់មន្ត្រីយោធាជាន់ខ្ពស់ នឹងត្រូវធ្វើឡើងនៅវេលាម៉ោង១២ថ្ងៃត្រង់ ថ្ងៃទី១២ខែតុលា ក្នុងតំបន់Chushul ស្ថិតនៅក្នុងទឹកដីឥណ្ឌា ។ នេះជាកិច្ចពិភាក្សាថ្នាក់មន្ត្រីយោធាជាន់ខ្ពស់លើកទី៧ហើយ ស្តីពីវិបត្តិតាមបណ្តោយព្រំដែន។
សារព័ត៌មាន PTI បានដកស្រង់ប្រភពព័ត៌មានពី រដ្ឋាភិបាលឥណ្ឌាបានឲ្យដឹងថា កិច្ចពិភាក្សា នឹងត្រូវធ្វើឡើង ក្នុងតំបន់ភាគខាងកើត Ladakh ស្ថិតក្នុងដែនអធិបតេយ្យ របស់ឥណ្ឌា។ កិច្ចពិភាក្សានោះនឹងផ្តោតទៅលើការដកទាហានចេញពីតំបន់មានវិវាទ។
ភាគីទាំងពីរ នឹងបន្តអនុវត្តវិធានការចាំបាច់ដើម្បីរក្សា សន្តិសុខ ក្នុងតំបន់ព្រំដែន បញ្ចៀសការប្រឈមមុខដាក់គ្នា ដូចពេលកន្លងមក។
ក្រោយកិច្ចពិភាក្សាលើកទី៦ នៅថ្ងៃទី ២១ខែកញ្ញា ភាគីទាំងពីរ បានប្រកាសពីសេចក្តីសម្រេចមិនបញ្ជូនទាហានទៅកាន់ព្រំដែនបន្ថែមទៀតឡើយក្នុងរដូវរងាអូសបន្លាយរយៈពេល៤ខែនៅទីនោះ។ កិច្ចពិភាក្សានោះដើម្បី អនុវត្តទៅតាម កិច្ចព្រមព្រៀង៥ចំណុចដែលរដ្ឋមន្ត្រីការបរទេសឥណ្ឌា S Jaishankar និងសមភាគីចិនលោកវ៉ាងយី ក្នុងជំនួបនៅទីក្រុងមូស្គូកាលពីថ្ងៃទី១០ខែកញ្ញា។
នៅក្នុងព្រិត្តិការណ៍មួយផ្សេងទៀត ពាក់ព័ន្ធបញ្ហាព្រំដែន ឥណ្ឌា ចិន នោះដែរ រដ្ឋមន្ត្រីការបរទេសអាមេរិក លោកMichael Pompeo បានប្រកាសថា ចិនបានបញ្ជូនទាហានដល់ទៅ៦ម៉ឺននាក់ទៅកាន់តំបន់ព្រំដែនភាគខាងជើងប្រទេសឥណ្ឌា ដែលជាហេតុបង្កឲ្យមានភាពតានតឹងខ្លាំងឡើង ។ ប៉ុន្តែមកទល់ពេលនេះ ទាំងភាគីឥណ្ឌា និងចិន មិនបានបញ្ចាក់ពីព័ត៌មានខាងលើនោះឡើយ មិនដឹងថា មន្ត្រីការបរទេសអាមេរិក និយាយនោះត្រឹមត្រូវដែរឬយ៉ាងណា៕ដោយ៖ធី រីណា