សារព័ត៌មាន នគរវត្ត តែងតែនាំមុខគេជានិច្ច
ពលរដ្ឋថៃរាប់ពាន់នាក់បាននាំគ្នាប្រមូលផ្តុំនៅទីក្រុងបាងកកនាថ្ងៃទី១៥ ខែតុលា ធ្វើបាតុកម្មប្រឆាំងនឹងរដ្ឋាភិបាលថៃ ។ បាតុកម្មធ្វើឡើងក្នុងគោលដៅប្រឆាំងនិឹងព្រះមហាក្សត្រ Maha Vajiralongkorn ក៏ដូចជានាយករដ្ឋមន្ត្រីថៃ ប្រាយុទ្ធ ចាន់អូចានេះត្រូវបានគេចាត់ទុកថាជាឧបសគ្គយ៉ាងធំធេងដល់រដ្ឋាភិបាលថៃ ។
នៅរសៀលថ្ងៃទី១៥ ខែតុលា ក្រុមបាតុករថៃបានប្រមូលផ្តុំគ្នានៅមហាវិថី Ratchaprasong ។ លោក Panupon Jadnok មេដឹកនាំបាតុករមួយរូបក្នុងចំណោមមេដឹកនាំបាតុករថៃបានលើកឡើងថា «ត្រូវបង្ខំចូលក្នុងផ្លូវទាល់ យើងខ្ញុំនឹងតស៊ូរហូតដល់ស្លាប់ យើងមិនរាថយនោះឡើយ យើងមិនចេញទៅណាឡើយ»។
ក្រុមបាតុករបានលើកស្លាកបដា ជាច្រើនប្រឆាំងរដ្ឋាភិបាល ដោយបានលើកស្លាកបដាដែលសរសេរថា«សូមផ្ញើទៅកាន់គ្រួសារនិងមិត្តភក្តិទាំងអស់ បើខ្ញុំត្រូវគេសម្លាប់ សូមកុំខឹងដោយសារតែខ្ញុំចូលរួមធ្វើបាតុកម្ម»។
មិនខ្វល់ពីច្បាប់គ្រាមានអាសន្ន ការហាមប្រាមពីកម្លាំងប៉ូលិស នៅថ្ងៃទី១៥ ខែតុលា ក្រុមបាតុករជាច្រើនបានបន្តធ្វើបាតុកម្មប្រឆាំងរដ្ឋាភិបាល ទាមទារឱ្យនាយករដ្ឋមន្ត្រី ប្រាយុទ្ធ ចាន់អូចា ចុះចេញពីតំណែង។
ក្រុមអ្នកឯកទេសវិភាគបានលើកឡើងថា ស្ថានភាពនយោបាយនៅក្នុងប្រទេសថៃ អាចនឹងអាក្រក់ ប្រសិនបើមិនមានការកែទម្រង់។ អ្នកដែលចូលរួមធ្វើបាតុកម្មនាពេលនេះ គឺខុសពីលើកមុនៗដោយក្រុមបាតុករគឺជាបញ្ញវន្តរបស់ថៃ ជានិស្សិត ជាអ្នកនឹងស្នងប្រទេសជាតិនាពេលអនាគត មិនមែនជាប្រជាកសិករដូចកាលពីមុនឡើយ។ ទាំងនោះហើយទើបធ្វើឲ្យរដ្ឋាភិបាលពិបាកនៅក្នុងការស្វែងរកដំណោះស្រាយ ៕ដោយ៖ធី រីណា
