សារព័ត៌មាន នគរវត្ត តែងតែនាំមុខគេជានិច្ច
សារព័ត៌មានរ៉យទ័របានផ្សាយថា កាលពីថ្ងៃទី១៥ ខែតុលា ចិនបានចោទប្រកាន់កាណាដាថាបានចាប់ពលរដ្ឋរបស់ខ្លួនធ្វើជាចំណាប់ខ្មាំង។ ទន្ទឹមនឹងនោះទីក្រុងប៉េកាំងបានស្នើដល់រដ្ឋាភិបាលទីក្រុង អូតាវ៉ា«Ottawa »ដោះលែងអតីតអគ្គនាយកហិរញ្ញវត្ថុរបស់ក្រុមហ៊ុនបច្ចេកវិទ្យារបស់ចិន គឺលោកស្រី
ម៉េង វ៉ាន់ជូ។
ឯកអគ្គរដ្ឋទូតចិនប្រចំានៅកាណាដា លោក Cong Peiwu បានបញ្ជាក់ថា «ចិនមិនដែលអនុវត្តគោលនយោបាយការបរទេសដាក់គំនាបនោះឡើយ។ ចំណែកពលរដ្ឋកាណាដា២នាក់ដែលចិនចាប់ខ្លួននោះ គឺបានចូលរួមនៅក្នុងសកម្មភាពគំរាមកំហែងដល់សន្តិសុខជាតិរបស់យើងខ្ញុំ»។
លោក Cong Peiwu បន្តទៀតថា ករណីរបស់លោកស្រី ម៉េង វ៉ាន់ជូ ត្រូវកាណាដាចាប់ខ្លួន និងករណីជនជាតិកាណាដា២រូប មានឈ្មោះMichael Spavor និង Michael Kovrig ត្រូវចិនចាប់ខ្លួននោះគឺខុសគ្នាដាច់តែម្តង។ លោកស្រី ម៉េង វ៉ាន់ជូ មិនដែលបំពានច្បាប់របស់កាណាដានោះឡើយ ។ ដូច្នេះ លោកស្នើដល់រដ្ឋាភិបាលកាណាដា ដោះលែងលោកស្រីជាបន្ទាន់។
លោកស្រី ម៉េង វ៉ាន់ជូ ត្រូវបានកម្លាំងសន្តិសុខកាណាដាចាប់ខ្លួននៅទីក្រុង Vancouver កាលពីចុងឆ្នាំ ២០១៨ តាមសំណើរបស់អាមេរិក ដោយចោទប្រកាន់ពីបទ ទំនាក់ទំនងជាមួយអុីរ៉ង់បំពានច្បាប់ ទណ្ឌកម្មរបស់អាមេរិក ។ តាំងពីពេលនោះមកបានធ្វើឲ្យទំនាក់ទំនងប្រទេសទាំងពីរ ចិន-កាណាដា កាន់តែតានតឹង៕
ដោយ៖ធី រីណា
