សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ស្ពឺ៖ សិល្បករប្រុសស្រីល្បីឈ្មោះ រួមទាំងសប្បុរសជនជាច្រើនបានរួមគ្នាក្នុងការផ្តល់ជាថវិកា និងអំណោយជួយដល់ពលរដ្ឋរងគ្រោះដោយទឹកជំនន់នាស្រុកគងពិសីខេត្តកំពង់ស្ពឺ។
ការរួមគ្នាពីសិល្បករនេះធ្វើឡើងក្រោយពីការបង្ហាញពីគំរូនៃវីរភាពរបស់ប្រមុខរដ្ឋាភិបាលកម្ពុជា ដែលការជួយនេះដែរក៏ត្រូវបានធ្វើឡើងតាមរយៈតារាចម្រៀងលោក ករុណាពេជ្រ ក្រោមយុទ្ធនាការរួមគ្នាដើម្បីខេត្តកំពង់ស្ពឺ។
ការចុះចែកអំណោយដោយផ្ទាល់នេះត្រូវបានធ្វើឡើងកាលពីថ្ងៃទី១៨ ខែតុលា នេះដោយមានការចូលរួមផងដែរ ពីសំណាក់លោក សំ រិទ្ធី តំណាងរាស្រ្តខេត្តកំពង់ស្ពឺ រួមជាសិល្បករ សិល្បការិនីជាច្រើនរូបទៀត។ លោក ករុណាពេជ្រ បានបញ្ជាក់ថា អំណោយជាសម្ភារប្រើប្រាស់ គ្រឿងឧបភោគបរិភោគ និង ថវិកា មួយចំនួន បានមកពី ការចូលរួ មពី សិល្បករ សិល្បការិនី បណ្តាក្រុមហ៊ុនផ្សេង ៗ និង សប្បុរសជនក្នុងប្រទេស និង ក្រៅប្រទេស រួមជាមួយថវិកាផ្ទាល់របស់លោកដើម្បី យកទៅជូនផ្ទាល់ដៃដល់បងប្អូនប្រជាពលរដ្ឋដែលកំពុងលិចលង់ដោយទឹកជំនន់ ចំនួន ៣០០គ្រួសារ ក្នុងស្រុក គងពិសី ខេត្តកំពង់ស្ពឺ ។ លោកបានចាត់ទុកសកម្មភាពនេះថាជាសកម្មភាពមនុស្សធម៌ និងឆ្លុះបញ្ចាំងពីទឹកចិត្តចែករំលែកជួយគ្នាក្នុងនាមជាខ្មែរដូចគ្នា។ លោកក៏សូមថ្លែងអំណរគុណ លោក លោកស្រី សិល្បករ សិល្បការិនី សប្បុរជនក្នុងប្រទេស និង ក្រៅប្រទេសដែលមានទំនុកចិត្តមកលើរូបលោក ហើយថែមទាំងបានបរិច្ចាគ ពេលវេលា ថវិកា រួមជាមួយសម្ភារ ផ្សេងៗផងដែរ។
សិល្បករដែលបង្ហាញវត្តមានក្នុងឱកាសនោះមានដូចជា អ្នកនាងកាតុ លោក សុគន្ធថេរ៉ាយុ លោក រ៉ាស៊ី លោក ពេជ្រ ថាណា ជាដើម ខណៈដែលមានសិល្បករជាច្រើនដែលបានចូលរួមជាថវិកាប៉ុន្តែមិនបានចូលរួមដោយផ្ទាល់៕ ដោយ៖ វឌ្ឍនា
